Белоруссия Президенти Александр Лукашенко «Россия» телеканалига берган интервьюсида «Ўзбекистон ва Қозоғистон товарларини Америка ва Европада ҳеч ким кутиб тургани йўқ. Улар бари-бир Россия бозорига сотади»,- деган эди. Ростдан ҳам икки мамлакатни Россиядан бошқа бозори йўқми? Бу гаплар қанчалик асосли? Uzdiplomat.uz мухбири бу саволга Қозоғистоннинг Ўзбекистондаги элчиси Бейбут Атамкуловдан жавоб олди.
Унинг айтишича Ўзбекистон ва Қозоғистоннинг денгизга тўғридан тўғри чиқадиган йўли йўқ. Шунинг учун икки мамлакат юз йиллардан буён қўшнилари билан бирга савдо сотиқ қилиб келган.
Шунингдек, Қозоғистон Россия, Хитой, Эрон давлатлари билан ҳам қўшничилик асосида савдо-сотиқ қилган.
«Қозоғистон Евроосиё Иқтисодий Иттифоқи доирасида ҳам йирик ҳамкорларга эга. Ўзбекистон ҳам Евроосиё иқтисодий Иттифоқида кузатувчи мақомида. Лекин шу билан бирга биз бугунги кунда маҳсулотларимизни жаҳон бозорига олиб чиқиш учун инфратузилмани яратмоқдамиз», – деди элчи.
Унга кўра, Қозоғистон учун ҳар бир қўшни мамлакат муҳим аҳамиятга эга.
«Тўғри, турли хил фикрлар бўлиши мумкин. Лекин биз шу билан бирга асрлар давомида шаклланиб келган қўшничиликдаги савдо-сотиқни унутмаймиз. Биз Россия, Хитой, Қозоғистон, Ўзбекистон, ўзаро савдолари олдиндан бўлган ва бўлади», — деди Бейбут Атамкулов.