Қозоғистон Ташқи ишлар вазири ўринбосари Алибек Бақоев «Толибон»нинг дипломатик миссияси раҳбари Муҳаммад Раҳмон Раҳмонийни Афғонистоннинг Қозоғистон Республикасидаги Муваққат ишлар вакили сифатида аккредитациядан ўтказди. Бу ҳақида Қозоғистон Ташқи ишлар вазирлиги хабар берди.
Жорий йилнинг 21 август куни Қозоғистон Ташқи ишлар вазири ўринбосари Алибек Бакаев Афғонистон дипломатик миссияси раҳбарини қабул қилди.
Учрашувда А.Бакаев М.Раҳмонийни Афғонистоннинг Қозоғистондаги Муваққат элчи сифатида аккредитация қилганини ва бунда Афғонистон ва Қозоғистон ўртасидаги савдо-иқтисодий муносабатлар ва гуманитар ҳамкорликни кенгайтириш ҳар икки давлат учун ҳам муҳим эканлиги маълум қилинди.
Музокаралар давомида Қозоғистон Афғонистонга ёрдам кўрсатиш ва гуманитар муаммоларни ҳал қилиш бўйича саъй-ҳаракатларни бирлаштириш тарафдори эканлиги таъкидланди. Шу мақсадда Қозоғистоннинг Олмаота шаҳрида Марказий Осиё ва Афғонистон мамлакатлари учун Барқарор ривожланиш мақсадлари бўйича БМТ нинг минтақавий марказини ташкил этиш таклиф қилинди.
Маълумот учун, «Толибон» элчисини бугунги кунга қадар фақат Хитой аккредитациядан ўтказган.
Эслатиб ўтамиз, 19 август куни Бош вазир Абдулла Ариповнинг Афғонистонга қилган расмий ташрифида «Толибон» ҳукумати вакилини Ўзбекистонда расмий элчи сифатида кўриш ва уни аккредитациядан ўтказиш масалалари муҳокама қилинган эди.
Бунга алоқадор расмий ташкилотлар бу хабар бўйича муносабат беришни хоҳламади.