Ҳоким ёрдамчилари институти 3 йил ичида қанчалар ўзини оқлади?
Нега улар орасида пора билан қўлга тушаётганлар сони ортиб бормоқда?
Бу лавозим ўрни шу жамиятимизга керакми ўзи?
Ҳоким ёрдамчилари лавозими 2021 йил декабрь ойида таъсис этилган эди. Ҳозирда уларнинг сони 9940 нафарни (2023 ҳолатига кўра) ташкил қилмоқда.
Ҳоким ёрдамчиларнинг маоши бириктирилган маҳалладаги хонадонлар сонига мутаносиб равишда белгиланади.
Яъни;
хонадонлари сони 500 та бўлган маҳаллалардаги ҳоким ёрдамчилари 6 млн 300 минг сўм;
хонадонлар сони 501 тадан 1 000 тагача бўлган маҳаллада 6 млн 900 минг сўм;
хонадонлар сони 1 000 тадан ортиқ бўлган маҳаллада меҳнатга ҳақ тўлашнинг энг кам миқдорининг 7 млн 350 минг сўм миқдорида маош олишади.
Ҳоким ёрдамчилари фаолиятини қўллаб-қувватлаш жамғармаси ҳам ташкил қилинган бўлиб, жамғармадан:
— ҳоким ёрдамчилари иш ҳақининг аввалги иш жойи бўйича ўртача ойлик иш ҳақи миқдоридан кам бўлган қисмини компенсация қилиш;
— бошқа ҳудудлардан келиб ишлаётган ҳоким ёрдамчилари ва республика вакиллари учун турар жой ижараси харажатлари учун компенсация тўлаш (БҲМнинг 2 баравари миқдорида – 540 минг сўм);
— иш фаолиятида яхши натижаларга эришган ҳоким ёрдамчилари ва республика вакилларини ҳар ойда мукофотлаш;
— ўз шахсий автомобилидан фойдаланаётган республика вакилларининг транспорт харажатларини компенсация қилиш;
— республика вакилларининг бир ойда бир марта доимий яшаш жойига темир йўл транспортида бориб келиши учун компенсация тўлаш «эконом» тарифи бўйича харажатларнинг 100 фоизи, «бизнес» тарифи бўйича харажатларнинг 70 фоизи;
кабиларни қоплаб бериш назарда тутилган.
Ҳоким ёрдамчиси лавозими ташкил қилинганидан буён матбуотда ҳоким ёрдамчиларининг турлича пора олиш ва мансабни суистеъмол қилаётганлиги тўғрисидаги хабарлар сизиб чиқмоқда.
Масалан: Наманган вилоятидаги 10 нафар ҳоким ёрдамчилари томонидан 80 дан ортиқ ана шундай қонун бузилиш ҳолатларига йўл қўйилгани аниқланган.
Самарқанд туманидаги маҳаллалардан бирида ҳоким ёрдамчиси кадастр ҳужжатларини қонуний расмийлаштириб бериш учун 1 300 АҚШ долларини сўраган.
Жалақудуқ тумани ҳокими ёрдамчиси куз-қиш мавсумига мўлжалланган кўмирни беришига 600 доллар пора талаб қилган.
Яқинда Кўкдала тумани ҳокими ўринбосари ҳам плёнка ишлаб чиқариш корхонаси фаолият кўрсатиши учун 5 минг АҚШ доллари беришини айтган эди.
Яна бир ҳоким ёрдамчиси банкдаги мансабдор танишлари орқали 150 миллион сўм миқдорида кредит чиқариб бериш эвазига 1500 АҚШ доллари миқдорида пул сўраган.
Маълумотларга кўра, 2022 йилнинг ўзида ҳоким ўринбосарлари 14 та(порахўрлик, фирибгарлик) жиноятини содир қилган. Шу пайтгача ҳоким ўринбосарлари билан умумий 40 га яқин қонун бузилиш ҳолатлари қайд этилган.
Ҳоким ёрдамчилари лавозими керакми? Фикрингиз муҳим.