Салим Абдувалиев Қирғизистондаги «Биродарлар давраси» халқаро жиноий гуруҳ таркибига кирган Қамчибек Асанбек (Қамчи Колбоев)нинг уюшган жиноий гуруҳи фаолиятини молиялаштиргани айтилмоқда. Бу ҳақда Қирғизистон Миллий хавфсизлик давлат қўмитаси матбуот маркази хабар берди.
Хабарда айтилишича, Салим Абдувалиев Ўзбекистон Республикаси ҳудудида жиноий тузилмаларга раҳбарлик қилган. Шунингдек, МДҲ давлатларида бевосита таъсирга эга бўлган ҳолда, гиёҳвандлик воситаларини Европа давлатларига олиб ўтиш бўйича ноқонуний каналлар ташкил этганлиги сабабли Қамчи Кўлбоевга мунтазам равишда моддий ёрдам кўрсатиб келган.
У шунингдек, Қамчи Кўлбоевни минтақадаги нуфузли жиноий авторитетлар қаторида Марказий Осиё мамлакатлари жиноят оламининг етакчиси бўлишига ёрдам берган.
Шу билан бирга, Қамчибек Асанбек ўзбек криминал гуруҳи бошлиғи Салим Абдувалиев томонидан ташкил қилинган байрам ва бошқа тадбирларга ташриф буюриб юргани уларнинг яқин муносабатда эканлигини англатади.
«Салим Абдувалиев Қирғизистон ва МДҲ давлатларида маълум даражада таъсир доирасини кенгайтириб, Қамчибек Асанбекнинг уюшган жиноий гуруҳини молиялаштирган», — дейилади хабарда.
Тўпланган материаллар асосида Қирғизистон Республикаси Бишкек шаҳар Октябрь туман суди қарори билан Салим Абдувалиевга нисбатан қамоққа олиш тарзидаги сиртдан эҳтиёт чораси танланиб, у ҳам давлатлараро қидирувга берилган.
Маълумот учун, жорий йилнинг март ойида жиноят ишлари бўйича Яшнобод тумани судида, Салим Абдувалиев жиноят кодексининг 248-моддаси (Ўқотар қуролнинг, ўқ-дориларнинг, ўқотар қурол асосий қисмларининг, портловчи моддаларнинг, портлатиш воситаларининг ёки портлатиш қурилмаларининг қонунга хилоф муомаласи) 2-банди билан айбдор деб топилиб, 6 йил муддатга озодликдан маҳрум қилинган эди.
Эслатиб ўтамиз, Қирғизистон Республикаси Юқори Кенгаши депутати Эмил Жамғирчиев ўзбекистонлик криминал Салим Абдувалиевдан ёрдам сўраб мактуб ёзгани ва Ўзбекистон чегарасини ноқонуний кесиб ўтгани Қирғизистон жамоатчилигида кенг муҳокамаларга сабаб бўлган эди.