Қирғизистон Президенти Садир Жапаров Ўзбекистоннинг Қирғизистондаги Фавқулодда ва мухтор элчиси Хуршид Мирзоҳидовни дипломатик миссияси якунлангани муносабати билан қабул қилди. Бу ҳақда давлат раҳбари матбуот хизмати хабар берди.
Садир Жапаров Хуршид Мирзоҳидовнинг дипломатик хизмати давомида барча даражадаги муҳим икки томонлама тадбирлар ва ташрифлар бўлиб ўтгани, қатор муҳим Қирғизистон-Ўзбекистон икки томонлама ҳужжатлар имзолангани, савдо-иқтисодий йўналишда яхши натижаларга эришилганини таъкидлади.
“Ўзбекистон-Қирғизистон тараққиёт жамғармаси ташкил этилиб, унинг фаолияти бугунги кунда тизимли ва самарали амалга оширилмоқда, қирғиз-ўзбек давлат чегарасини делимитация қилиш якунланди, икки томонлама муносабатлар ҳар томонлама стратегик шериклик даражасига кўтарилди ва қўшма саноат кооперациясида янги имкониятлар очилди”,
деган Жапаров Ўзбекистон элчисига.
Президентимиз бунда Ўзбекистон Президенти Шавкат Мирзиёевнинг алоҳида ва муҳим ўрни борлигини алоҳида таъкидлаган.
Ўзбекистон элчиси Хуршид Мирзоҳидов давлатимиз раҳбарига самимий қабул учун миннатдорлик билдириб, Қирғизистон Садир Жапаров раҳнамолигида барча жабҳаларда, жумладан, савдо-иқтисодий, маданий-гуманитар ва спорт соҳаларида фаол ривожланаётганини алоҳида таъкидлади.
Мулоқот сўнгида Президент Садир Жапаров икки давлат ўртасидаги дўстлик ва ҳамкорликни мустаҳкамлашга қўшган улкан ҳиссаси учун Хуршид Мирзоҳидовни Қирғизистон Республикасининг Фахрий ёрлиғи билан тақдирлаган.
Маълумот учун, Хуршид Мирзоҳидов 2020 йилда Ўзбекистон Республикасининг Қирғизистон Республикасидаги Фавқулодда ва Мухтор элчиси этиб тайинланган эди.
У 1971 йили Тошкент шаҳрида туғилган. Маълумоти олий. 1995 йилда Тошкент электротехника алоқа институтини тамомлаган. Мутахассислиги радиоалоқа, радиоешиттириш ва телевидение муҳандиси.
У 2002-2003 йилларда Ўзбекистон Республикаси Вазирлар Маҳкамаси Алоқа ва ахборот технологиялари комплекси раҳбари котибиятининг мудири сифатида ишлаган. 2003-2004 йилларда Ўзбекистон алоқа ва ахборотлаштириш агентлиги бош директори ўринбосари лавозимини эгаллаган. 2004 йилнинг сентябридан декабрига қадар “Ўзбектелеком” АК бош директори ўринбосари, 2004 йилдан 2006 йилга қадар Ўзбекистон Республикаси Вазирлар Маҳкамасининг Ахборот тизимлари ва телекоммуникациялар масалалари ахборот-таҳлил департаменти мудири, 2006 йилдан 2009 йилгача “Ўзпроммашимпекс” давлат акциядорлик компанияси бошқаруви раиси сифатида фаолият кўрсатган. 2009-2010 йилларда Ўзбекистон миллий телерадиокомпанияси раисининг биринчи ўринбосари бўлган.
Х.Мирзоҳидов 2017 йил бошида ЎзМТРК раиси этиб тайинланганди. Мирзоҳидов бу лавозимда ярим йил, 2017 йил августига қадар фаолият юритди. 2017 йил октябр ойида Автомобил йўллари давлат қўмитаси раисининг автомобил йўллари бўйларидаги кўкаламзорлаштириш ва ободонлаштириш масалалари бўйича ўринбосари – «Ўзйўлкўкаламзорлаштириш» унитар корхонаси директори этиб тайинланганди.