«Чорвоқ» туристик зонасида 77 гектар ер узоқ муддатга ижарага берилаяпти. «Хумсон» санаторияси ҳам хусусийлаштирилмоқда.
Ижарага берилаётган ерларнинг бошланғич нархи ўртача 1 сотих ер учун 11 миллион сўм этиб белгиланган. Аукционга қўйилган ерлар Ўзбекистон фуқаролари учун 49 йилгача, хорижий фуқароларга эса 25 йилгача ижарага берилади.
Кейинчалик улар дирекция билан келишган ҳолатда муддатларни узайтиришлари мумкин. Шу билан бирга лотларнинг барча ғолибларига Президент фармонига асосан 24 ойга бўлиб тўлаш имкони яратилади.
Давлат активларини бошқариш агентлиги бош мутахассиси Отабек Омоновнинг айтишича, «Хумсон» санаторийсини хусусийлаштириш бўйича ишлар бошлаб юборилган. Ҳозирда хусусийлаштириш учун консультант жалб қилиинган.
«Хумсон санаторийси Жорий йилнинг 19 апрелдаги президент қарорига асосан хусусийлаштириш белгиланган, Ҳозирда «Хумсон» санаторийсини хусусийлаштириш бўйича консультант жалб қилинди. Унинг тавсиясига асосан ушбу санаториямизнинг хусусийлаштириш бўйича кейинги босқичи белгиланган» – деди у.
Бундан ташқари, «Чорвоқ» сув омбори яқинида жойлашган 44 та ер участкалари ижара ҳуқуқи асосида «e-auksion» электрон савдо платформасида савдога чиқарилган бўлиб, уларнинг умумий майдони 77 гектарни ташкил этади.
Шунингдек, йил бошидан буён «Чорвоқ» туристик зонасидан 138,78 гектар майдон «e-auksion»да сотувга қўйилган.
«Инвестиция мажбурияти бор. Иштирокчилар лот маълумотларига кирганида ҳамма лотларни қанча муддатга инвестиция киритиш мажбурияти борлиги ва инвестиция миқдори кўрсатилган, инвестиция мажбуриятини бажарганидан сўнг, дирекция билан ижара муддатини келишиб олишади.
Ер участкаларини сотиб олган харидор тўловларни 24 ой муддатда бўлиб тўлаш имкониятига эга бўлади. Бундан ташқари, бу ер участкаларида меҳмонхоналар, меҳмон уйлари, спорт-соғломлаштириш иншоотлари, хизмат кўрсатиш ва савдо мажмуаларини қуришга рухсат этилади», — деди Электрон онлайн савдо аукционларини ташкил этиш АЖ ходими Юсуфхон Хидайходжаев.