Лукашенко «Россия 1» телеканалидаги интервьюсида Марказий Осиё давлатлари, хусусан Ўзбекистон ҳақида кескин фикрлар билдирган. Унда Ўзбекистон ва Қозоғистон ўз маҳсулотларини Россиядан бошқа жойларда сота олмаслигини айтган.
Белорус Президенти Александр Лукашенко «Россия» телеканалига берган интервьюсида МДҲ давлатларининг Россияга нисбатан муносабатини қоралади.
«Россия ва Беларус аслида бир кемада. Агар у ағдарилса, биз ҳам бирга чўкиб кетамиз. Иттифоқчилик муносабатларимизни яширишнинг ҳожати йўқ. Россияга ҳеч нарса таклиф қилмайдиган, лекин фойда кутаётган баъзи давлатлардан фарқли ўлароқ, биз бундай ҳаракат қилмаймиз», — деган у.
Шунингдек, у постсовет ҳудудидаги мамлакатларни Россияга ҳеч нарса бермасдан фойда олаётганликда айблаган.
«Сиз яна Россияга ёрдам сўраб мурожаат қилишингиз керак бўлган кун узоқ эмас. Инқироз юз берган тақдирда, худди Қозоғистонда бўлгани каби, ҳамма Путинга ёрдам сўраб мурожаат қилади. Биз (КХШТ) тезда жавоб қайтардик, куч юбордик ва тартибсизликларни тинчитдик», — деган Беларус Президенти.
Бунга жавобан Белоруснинг Қозоғистондаги элчиси Павел Утёпин Ташқи ишлар вазирлигига чақиртирилган.
Учрашувда вазирлик Қозоғистон БМТ Низоми ва халқаро ҳуқуқнинг асосчи нормаларига мувофиқ мувозанатли ва тинчликсевар ташқи сиёсат юритаётганини таъкидлаган. Икки мамлакат ўртасидаги барча келишмовчиликларни сиёсий ва дипломатик йўллар билан ҳал этиш зарурлигини айтиб ўтган.
«Беларус томонини ҳозирги жараёнларга нисбатан Остона позициясини холисона баҳолашга чақирди», — дейилади Қозоғистон Ташқи ишлар вазирлиги хабарида.
Интервьюда Ўзбекистон ҳам тилга олиниб Ўзбекистон ва Қозоғистоннинг товарларини Америка ёки Европа Иттифоқида ҳеч ким кутмаётганлиги ва бари-бир уни Россияга сотишини айтган.
«Америкада ёки Европа Иттифоқида Қозоғистон ёки Ўзбекистон товарларини ким кутмоқда? Йўқ, уларни Россияга сотмоқчи. Бизда умумий бозор бор ва уни йўқотиш ақлсизлик бўлади» , — дея қўшимча қилган Лукашенко.
Украина нашрларида Курскда вазият жиддийлашаётган бир вақтда Лукашенконинг марказий рус каналларидан бирида чиқиши Россиянинг мағлуб бўлаётганлигидан далолатлиги айтилмоқда.
«Лукашенконинг Россия марказий каналида пайдо бўлиши Россиянинг иттифоқчиларини сўзсиз қўллаб-қувватлашига ишора қилиши керак. Бироқ, аслида, ўзини Курскдан четга олган ва Донбассдаги навбатдаги қишлоқни эгаллашга мутаассибларча уринаётган Путин фонида Беларус Президенти Кремл учун вазият унчалик фойдали эмаслигини тушуниб, жамоатчилик майдонига атайлаб босиқ сигналлар юборишга мажбур бўлди» , — дейилган «Делпи» нашрида.
Бундан ташқари, Украина нашрлари Лукашенконинг интервьюсини Рус армиясини енгилмаслигига ишонтириш учун мўлжалланган бир классик тарғибот шоу эканлигини ёзган.
«Интервью Курск вилоятидаги воқеалар ва кўзга ташланаётган ҳокимиятнинг сусткашлиги фонида русларни лоақал жонлантириш, Путин қарорларининг бенуқсонлигига ва Россия чегарасини очиқ қолдирган Россия армиясининг енгилмаслигига сўнаётган ишончни қўллаб-қувватлаш учун мўлжалланган ўзига хос классик тарғибот шоусига айланди», — дейилади нашрда.