“Исломда 4 хотинликка рухсат бўлсада, бизда кўп хотинлик давлат амалдорлари ишдан ҳайдалади»… Эрон элчиси Ғазодаги уруш, мамлакатидаги эркинлик ва Афғонистон бўйича муносабатини берди.
Эрон Ислом Республикасининг Ўзбекистондаги элчихонаси томонидан журналистлар учун ифторлик учрашуви уюштирилди.
Ифторлик аввалида Элчи жаноблари Муҳаммадали Искандирий кичик маъруза қилди. Унда жаноб элчи Исроил давлати ва Фаластин ўртасидаги можарога тўхталди.
“Эрон Ислом Республикаси ушбу ваҳшийларча ҳужумни қаттиқ қоралайди ва ушбу аянчли вазиятнинг асосий сабабчилари жазоланиши лозимлигини уқтиради ҳамда бутун бошли бир халқнинг ошкора геноцид қилинаётганлиги тўғрисида огоҳлантиради. Бу аснода, ислом дунёсининг энг муҳим сиёсий ва гуманитар устуворлиги сифатида, ишғолчи режимни ҳимоясиз Фаластин халқига қарши ҳар қандай тажовузкорона хатти-ҳаракат қилишдан қайтариш ҳамда Ғазо секторининг барча нуқталарига инсонпарварлик ёрдамларини узлуксиз тарзда юбориш мақсадида таъсирчан чоралар кўриш зарурлигини таъкидлайди”, – дея, элчи Эрон Ислом Республикасининг можаро бўйича аниқ қораловчи позициясини айтиб ўтди.
Шунингдек, Афғонистон масаласида “АҚШдан сўнг бу давлат ҳамон ўзини тиклай олмаяпти”, дея фикр билдирди.
Жаноб Искандарий икки давлат ўртасидаги иқтисодий муносабатларга тўхталар экан бизнесменлар Эрон имкониятларини назардан четда қолдираётганларини ҳам таъкидлаб ўтди.
Учрашувда элчи Муҳаммадали Искандарий ва журналистлар ўртасида қисқа савол-жавоб тариқасида мулоқот ҳам бўлиб ўтди. Искандарий ўз нутқида Ўзбекистон журналистлари учун очиқлиги, ўзаро маданий муносабатларни мустаҳкамлашда журналистларга таянишини билдирди. Журналистлар Эрон ташқаридан ёпиқ, чекловлари бисёр бўлган давлат сифатида кўрилишини айтиб ўтди. Элчи уларга жавобан бу Эроннинг ғарб томонидан яратилган ёлғон қиёфаси эканлигини билдирди. Ҳамда мамлакатнинг сиёсий-ижтимоий ҳаётида аёлларнинг ўрни ҳам ортиб бораётганини айтиб ўтди.
“Исломда 4 хотинликка рухсат бўлсада, бизда кўп хотинлик давлат амалдорлари ишдан ҳайдалади. Кўпхотинлик қўллаб-қувватланмайди. Бу аёлга ҳурмат ва тенглик ишорасидир”, – деди жаноб Искандарий.
Аммо, айрим кичик этник гуруҳлар ичида 4 хотинлик ҳамон сақланиб қолган. Кенг миқёсда эса мамлакатда кўп хотинлик ижобий қабул қилинмаслиги айтилди.
Журналистлар ва элчи ўртасидаги учрашув очиқ мулоқот, танишув тарзида ўтди. Жаноб Искандарий Эроннинг ҳақиқий қиёфасини ҳикоя қилишни истаган журналист албатта, бу тарихий давлатга саёҳат қилиши кераклигини билдирди.