Қайта тикланувчи энергияни ривожлантиришга алоҳида эътибор қаратилади, раҳбарларнинг энергетика бўйича ўринбосарлари бўлади, энергия менежерларини тайёрлаш маркази ташкил этилади.
Шунингдек қатор фаолият турлари бўйича хусусий корхоналарга имкониятлар берилади.
Президентнинг «Қайта тикланувчи энергия манбаларидан фойдаланишни янада жадаллаштириш ва республика иқтисодиёт тармоқларининг энергия самарадорлигини ошириш чора-тадбирлари тўғрисида»ги қарори муҳокамага қўйилди.
Энергетика вазирлиги томонидан ишлаб чиқилган ушбу лойиҳада фақат халқаро “BNEF Tier – 1” рўйхатидаги компаниялар томонидан ишлаб чиқарилган қуёш панелларини импорт қилишга рухсат берилиши кўрсатилган.
Энергия истеъмоли юқори бўлган объектларни (ижтимоий объектлардан ташқари) энергия ресурслари билан таъминлаш ҳамда кўча ёритиш чироқларига хизмат кўрсатиш функцияларини давлат-хусусий шерикчилик асосида хусусий секторга бериш рухсат этилади.
Шунингдек, барча даражадаги давлат органлари ва ташкилотларида 2025 йил 1 январдан бошлаб амалдаги раҳбар ўринбосарларидан бирига энергия самарадорлиги ва энергия тежамкорлиги бўйича вазифалар юклатилади ҳамда энергия менежери лавозими киритилади.
Ҳужжат лойиҳасига кўра, раҳбарият учун энергия ресурсларини тежаш ва қайта тикланувчи энергия манбаларидан фойдаланишни жорий этиш бўйича асосий кўрсаткичлар (КПИ) жорий этилади.
Бундан ташқари, Энергетика вазирлиги марказий аппаратида умумий штатлар сони доирасида барча ташкилот ва корхоналарда энергия ресурслари истеъмолининг таҳлилини ўтказиш билан шуғулланувчи таркибий бўлинма ҳамда унинг ҳудудий бошқармалари ташкил этилади.
Маълумот учун, Республика 2030 йилга қадар қайта тикланувчи энергия манбаларининг умумий қуввати 28 ГВтга етказиши режалаштирилган.