Ливаннинг «Ҳизбуллоҳ» гуруҳининг Шура Кенгаши (бош бошқарув органи) Ҳошим Сафи ад-динни ташкилотнинг янги бош котиби этиб сайлади. Бу ҳақда «el Balad», «Al Arabiya»манбаларига таяниб «Central Asia» нашри хабар берди.
Қайд этилишича, Сафи ад-дин ижроия қўмитаси раҳбари лавозимини эгаллаган. У Исроил авиазарбасида ҳалок бўлган гуруҳнинг собиқ етакчиси Ҳасан Насрулланинг амакиваччаси ва Америка авиазарбасида ҳалок бўлган Эрон кучларининг собиқ қўмондони Қосим Сулаймонининг куёви ҳисобланади.
Таъкидланишича, собиқ ва янги раҳбарлар ташқи кўриниш жиҳатидан бир-бирига жуда ўхшайди.
Ҳошим 1964 йилда Ливан жанубидаги Дейр-канун ан-Наҳр шаҳрида туғилган. У Насрулла билан бирга Нажафда таҳсил олган. 1982 йилда «Ҳизбуллоҳ» нинг ҳаммуассиси бўлган.1994 йилда Сафи ад-дин ижроия қўмитаси раҳбари сифатида фаолият кўрсатган. Насрулла 2008 йилда вафот этган тақдирда амакиваччасини вориси сифатида тавсия қилган.
Маълум қилинишича, Сафи ад-дин ўттиз йил давомида Насруллага умумий стратегия ишлаб чиқишни қолдириб, гуруҳнинг махфий ишлари билан шуғулланган. У «Ҳизбуллоҳ»нинг сиёсий, ижтимоий, маданий ва таълим фаолиятини назорат қилиш билан шуғулланган. 2017 йил май ойида АҚШ ва Саудия Арабистони Сафи ад-динни террорчилар рўйхатига қўшган.
Насрулла 28 сентябрь куни Исроилнинг Бейрутдаги ер ости штабига қилинган авиазарбасида ҳалок бўлган. У «Ҳизбуллоҳ»ни 30 йилдан ортиқ бошқарган. Ҳаракат раҳбарияти «Ғазо ва Фаластинни, шунингдек Ливанни қўллаб-қувватлаш учун душман олдида жиҳодни давом эттиришига» ишонтиргани айтилмоқда.