Нью-Йорк мери Эрик Адамс 2021 йилги сайлов кампанияси учун хорижий давлатлардан пул олганликда гумонланмоқда. Бу давлатлар орасида Ўзбекистон ҳам борлиги оммавий ахборот воситаларида хабар қилинган. Бу ҳақида «The New-York Times» нашри хабар берди.
2023 йилнинг ноябрь ойида мер алоҳида федерал тергов доирасида телефонларини топширган. Тергов унинг 2021 йилги сайлов кампанияси учун Туркия фуқаролари ва давлат амалдорларидан ноқонуний хайрия олганми йўқми шу масалани ўрганмоқда.
Қайд этилишича, бу тергов фақатгина Туркияни эмас, балки Исроил, Қатар, Хитой, Жанубий Корея ва Ўзбекистонга ҳам даҳлдор. Ўзбекистон — Адамс ташриф буюрмаган ягона давлат эканлиги айтилмоқда.
Терговчилар Адамснинг сайлов штаби Туркия ҳукумати билан келишиб, сайлов олдидан ноқонуний маблағ олганлигини гумон қилиб, буни аниқлашга уринмоқда.
Шунингдек, мер ёнғин хизматига босим ўтказиб, хавфсизлик муаммоларига қарамай, Туркиянинг янги консуллиги қурилишини маъқуллашга уринганига оид гумонлар ҳам тергов қилинмоқда.
Адамс ҳар қандай ҳуқуқбузарликни инкор этиб, Бронксдаги жамоатчилик учрашувида унинг маъмурияти шаҳар учун хизмат қилишга қаратилганини таъкидлаган.
«Бу жамоа ўз ишига содиқ бўлиб, Нью-Йорк шаҳри тарихидаги энг хилма-хил маъмуриятлардан бири ҳисобланади. Улар олдимиздаги вазифани бажаришда бизни олдинга етаклашда давом этмоқда», — дейди Адамс.