Ўзбекистон ўртача иш ҳақи тўлайдиган давлатлар рейтингида 119-ўринни қайд этди. Бу ҳақда “Seoworld” журнали маълум қилди.
Нашрнинг хабар беришича, 2024 йилдаги энг юқори ва энг паст иш ҳақи тўлайдиган давлатлар рейтинги мамлакатларнинг ўртача ойлик иш ҳақига қараб тузилган. Ушбу рейтингда 196 та мамлакат қатнашган.
Рейтингда энг кўп иш ҳақи тўлайдиган давлатлар Швейцария (8111 доллар), Люксембург (6633 доллар), АҚШ (6455 доллар) юқори учликда қайд этилган бўлса, ундан кейинги ўринларда Исландия (6441 доллар), Норвегия (5665) бешликни якунлаган.
Ўзбекистон 351 доллар билан бу рейтингда Марказий Осиё давлатларидан Афғонистон (138-ўрин. 205 доллар), Қирғизистон ( 135-ўринда. 228 доллар) ва Тожикистон ( 143-ўринда. 169 доллар)дан юқори поғонада жойлашган, аммо Қозоғистон ( 80-ўрин. 673 доллар) ҳамда Туркманистон ( 83 – ўринда. 654 доллар) давлатларидан пастги ўринда қайд этилган.
Эслатиб ўтамиз, “Sparobaks” халқаро веб сайтида виза ҳомийлиги билан Ўзбекистонда биология ўқитувчиси учун 4200 АҚШ доллари маоши таклиф қилингани ҳақида хабар берган эдик.