Ўзбекистоннинг Буюк Британияга янги тайинланган элчиси Равшан Усмонов Лондон шаҳрида Британия ва Шимолий Ирландия Бирлашган Қироллиги Қироли Чарльз III га ишонч ёрлиқларини топширди. Бу ҳақда “Дунё” АА хабар қилди.
Расмий маросимда элчининг турмуш ўртоғи Ирода Усмонова ҳам иштирок этган.
Улар билан бўлиб ўтган суҳбат чоғида эса Қирол Чарльз III Ўзбекистон Президенти Шавкат Мирзиёевга чуқур ҳурмат ва илиқ тилакларни билдирган.
“Буюк Британия ва Ўзбекистон ўртасидаги ўзаро ҳамкорликнинг бугунги динамикаси юқори баҳоланди. Кенг йўналишларда ҳамкорликни янада чуқурлаштириш учун мавжуд салоҳиятдан самарали фойдаланиш зарурлиги таъкидланди.
Суҳбат якунида Буюк Британия Қироли Ўзбекистон элчисига икки томонлама муносабатларни янада юксалтириш йўлидаги ишларига муваффақиятлар тилади”,
дейилади хабарда.
Маълумот учун, Ўзбекистоннинг Буюк Британиядаги янги тайинланган Фавқулодда ва Мухтор Элчиси Равшан Усмонов 2023 йилнинг ноябрь ойидаёқ Лондонга етиб борган.
У 2018 йилдан буён Ўзбекистоннинг Малайзиядаги элчиси сифатида ишлаб келаётган эди. Дипломат 45 ёшда. Бирмингем университети (Буюк Британия), Ўзбекистон ТИВнинг Жаҳон иқтисодиёти ва дипломатия университети ҳамда Тошкент давлат юридик институтини (ҳозирги университет) тамомлаган.
Ташқи сиёсат идорасидаги фаолиятини 2000 йилда бошлаган. Ўтган йиллар давомида марказий аппаратда ва Ўзбекистоннинг Испаниядаги элчихонасида турли лавозимларда ишлаган. Шундан кейин ТИВнинг Европа мамлакатлари ва НАТО билан ҳамкорлик бошқармасини бошқарган. Франциядаги элчи, шунингдек, Италия ва Португалиядаги ўриндошлик асосидаги элчи лавозимида фаолият кўрсатган.
Равшан Усмонов 2019 йилдан буён Лондондаги элчи лавозимида ишлаб келган Саид Рустамов ўрнига тайинланди.