Ўзбекистон ёки пойтахт Тошкент ҳақида кўп гапирилади. Ундаги камчилик ва ютуқлар ҳам тез-тез тилга олинади. Аммо мамлакатга нисбатан бошқаларнинг, чет эл фуқароларининг фикри қандай? Uzdiplomat.uz янги лойиҳа бошлади. Унда эса Тошкентга ташриф буюрган туристларнинг мамлакат ҳақидаги фикрлари ўрганилади.
Таомлари тотли Тошкент
Саволларимизга жавоб берган бир неча сайҳлар Тошкент таомларининг мазалилиги ҳақида сўз юритди. Масалан, туркиялик турист Тошкентнинг ширинликларини мақтади.
“Бугун менинг Тошкентдаги биринчи куним. Фикримча, бу ер жуда қулай шаҳар. Биз Тошкентда хавфсиз саёҳат қила оламиз.
Мен бу ерга Туркиядан кеча етиб келдим ва тўғриси ҳали кўп жойларни кўришга улгурмадим. Аммо мана бу нарса жуда маззали экан. Булар биз учун бегона, биринчи мартта татиб кўришимиз. Шунинг учун менга ва қизимга жуда ҳам ёқди”,
деди у.
Кўпчиликка эса ўзбек миллий таоми ош маъқул келган.
“Биз бир қанча жойларга бордик. Масалан “Чорсу” бозорига, Амир Темур музейига ва миллий таомингиз палов тайёрланадиган ошхоналарга. Палов жуда ширин эди, менга у ёқиб қолди”,
деди Ҳиндистондан келган турист.
Кореялик сайёҳ ҳам унинг гапларига қўшилган.
“Тошкентдалигимда мен кўп музейларда бўлдим ва албатта бу ерда жуда кўп ресторанларга кирдим. Менга ҳамма жой ёқди. Айниқса таомлари жуда мазали. Ош, яъни паловга гап бўлиши мумкинмас”,
деди у.
“Ўзбекистон аёллар ёлғиз саёҳат қилиши учун хавфсиз давлат экан”
Бизга интервью берган Тошкентга, Ўзбекистонга ташриф буюрганларнинг барчаси мамлакат саёҳат учун хавфсиз, қулай экани ва шаҳар кўчалари ҳам тоза-озодалигини маълум қилди.
“Ўзбекистонда ҳаракатланиш учун яхши инфратузилма мавжуд. Менинг фикримча, бу ерда туристлар қийинчиликсиз саёҳат қила оладилар. Ўзбекистон жуда тоза. Мамлакатда сайёҳлик тизими яхши ташкил этилган”,
деди Тошкентда оилавий саёҳат қилаётган Ҳиндистонлик эркак.
“Албатта менга Ўзбекистон жуда ёқди, Айниқса Тошкент. Бу ер жуда замонавий, хавфсиз ва биз қийинчиликсиз саёҳат қилябмиз. Шуни алоҳида айта оламанки, Ўзбекистон аёллар ёлғиз саёҳат қилиши учун хавфсиз давлат экан”,
деди Покистондан келиб Тошкентда ўқувчи талаба қиз.
“Ўзбекистон жуда чиройли мамлакат. Мен ўтган ҳафта дам олиш масканига бордим. У ер жуда чиройли ва яшил маскан эди. Шунинг учун менга у ер жуда ёқди”,
деди бошқа бир ҳиндистонлик эркак.
Чикагодан Ўзбекистонга келган турист қиз эса ўзбекистонликларнинг жуда меҳрибон эканини айтмоқда.
“Ўзбекистон саёҳат учун жуда қулай, тоза ва одамлари меҳрибон, мен шу ердалигимдан ҳурсандман. Мен Тошкентга кеча етиб келдим ва бу вақт давомида биз кўп савдо марказларида бўлдик”,
деди у.
“Ўзбекистон саёҳат учун қулай давлат. Мен бу ерда инглиз тилида гаплаша оладиган яхши инсонларни топдим. Шунингдек, мен ўзбекларнинг тилини ўрганишга ҳаракат қиляпман. Мамлакат хавфсиз ва яхши”,
деди ўзбекистонликлар ҳақида яна бир саёҳатчи қиз.
“Мен бу ерда замонавий оригинал биноларни кўп кўрмадим”
Uzdiplomat.uz микрафон тутган туристларга Тошкентнинг тарихий ва яшил ҳудудлари кўпроқ ёқади. Аммо улар афсуски, “Чорсу”дан бошқа тарихий масканлар ҳақида гапиришга қийналишди. Кореялик саёҳатчининг айтишича пойтахтдаги замонавий бинолар оригинал эмас.
Уларнинг айтишича, саёҳат учун Тошкентдан кўра Самарқанд яхшироқ.
“Ростини айтсам, мен бу ерда кўп оригинал, замонавий биноларни кўрмадим. Аммо мен миллий ва тарихий биноларни афзал кўраман. Замонавий бинолар ҳам яхши лекин улар миллий биноларга раҳна солмаслиги керак”,
деди у.
Туркиялик:
“Мен бугун шунчаки “Чорсу” бозорига келдим. Бундай тарихий ва Шарқона маскан менга жуда ёқди.
Афсуски, мен ҳали Тошкентнинг бошқа кўп жойларини кўролмадим. Балки сизнинг саволингизга эртага тўлиқ жавоб бера оларман. Чунки келганимдан бери мен фақатгина шу ерга ташриф буюрдим ва аниқ айта оламанки, бу жой менга ёқди”.
Ҳиндистонликлар:
“Албатта, ҳамма шаҳарнинг ўз тарихий масканлари бор ва бу уларнинг асосий хусусияти ҳисобланади. Тарих келажак авлод учун муҳим. Улар ўтмиш қандай бўлгани ва улар нималар, қандай буюк ишлар қилишганини, қандай ҳаёт кечирганини тарихий жойлар ёрдамида билишлари мумкин. Шунинг учун сиз аҳоли учун замонавий жойларни барпо этиш давомида тарихий жойларни албатта сақлаб қолишингиз керак”.
“Биз бир қанча истироҳат боғларига ва музейларга бордик. Бир неча кун аввал эса Самарқандга бориб келдик ва у ерда 3-4 кун бўлдик. Энди эса тоққа боришни режалаштиряпмиз.
Ростини айтсам, бизга Самарқанд кўпроқ ёқди. Чунки у ернинг тарихий кўриниши жуда ажойиб. Шаҳарнинг тарихий архитектураси Ҳиндистонникига ўхшаш. Худди Тож Маҳал каби гўзал, шунинг учун ҳам бизга кўпроқ ёққандир балки”.
“Саёҳатим давомида мен “Чорсу” бозори, Амир Темур ҳиёбони ва Ўзбекистон меҳмонхонасини кўрдим. Ҳозирча кўп жойларни кўролмадим, аммо умид қиламанки, саёҳат учун кўпроқ вақт сарфлайман. Менга энг ёққан жой бу “Чорсу” ва метро станциялари бўлди. Улар жуда чиройли ва тоза экан.
Менинг ўйлашимча, бу мамлакатда замонавийлик ва тарихийлик жуда уйғун. Тошкент эски биноларни сақлаб қолиш ва замонавийларини қуриш бўйича яхши тажрибага эга. Мен Ҳазрати Имом масжидига бормоқчиман. Шуни айтишни унутибман”.
Покистонликлар:
“Ўзбекистон жудаям қулай жой. Мен Тошкентда тиббиёт йўналишида таҳсил оламан. Шу боис Тошкентнинг кўп жойларига аллақачон борганман. Менга Тошкентдаги боғлар жуда ёқади. Шунингдек, келажак авлод тарихий жойлар керак”.
“Биласизми, мен 4 ойдан бери Тошкентдаман. Аслида мен замонавий биноларнинг ҳам, тарихий биноларнинг ҳам қурилишини афзал кўраман. Бунинг учун эса, мен Самарқанд ва Бухорога боришни режалаштиряпман. Тошкентда эса Чорсу бозори каби тарихий жойлар жуда яхши”.
Кореяликлар:
“Менга музей ва савдо расталари ёқди. У ерлар жуда ҳам қулай, жуда ҳам тоза ва яшил эди. Тошкентда жуда кўп яшил майдонлар бор экан. Мамлакат учун тарихий маскани бўлиши муҳим, шунинг учун уларни бузмаслик керак. Янги бинолар ҳам қурилиши тарафдориман. Аммо яшил майдонларни сақлаб қолган ҳолда. Қурилишлар тарихий жойлар билан мувозанатда бўлиш керак. Уларни бузиш эмас, аксинча, сақлаб қолиш шарт”.
“Биз бу ерга келганимизга 3-4 кун бўлди. Ўйлашимча, Ўзбекистон бизнинг саёҳатимиз учун қулай. Cаёҳатимиз давомида музейга ва бир қанча боғларга бордик. Масалан, менга энг кўп ёқган жой бу Тошкент боғи бўлди. Биласизми, мен тарихий ҳудудлар ҳақида ҳеч нарса деёлмайман. Қандай яшаш сизнинг, ўзингизнинг хоҳишингиз”.
Чикаголик:
“Мен учун замонавий биноларнинг архитектурасини кўриш қизиқ, лекин ўзбеклар учун бу қандай, буни билмайман.”