Мирзиёев Эрон Ислом Республикасининг 9-президенти этиб сайланган Масъуд Пезешкиённи табриклади.
Президент Шавкат Мирзиёев ўз мактубида икки мамлакат ўртасидаги кўп қиррали ва узоқ муддатли шерикликнинг барча устувор йўналишларда янада юқори босқичга кўтарилишига ишонч билдирган.
«Биз катта салоҳият ва имкониятга эга бўлган, сўнгги йилларда жадал ривожланиб бораётган давлатингиз билан сиёсий, савдо-иқтисодий, транспорт-коммуникация ва маданий-гуманитар соҳалардаги ҳамкорликни бундан буён ҳам изчил ва самарали кенгайтиришдан манфаатдормиз»,
дейилган мактубда.
Маълумот учун, Масъуд Пезешкиён 1954 йилда Моҳобод қишлоғида туғилган. Этник жиҳатдан эрон озарбайжонларидан, онаси курд. Касби кардиожарроҳ, сиёсий фаолиятини 1997 йилда Соғлиқни сақлаш вазири ўринбосари лавозимидан бошлаган.