Ўзбекистонга хизмат сафари билан келиб, сўнг бедарак йўқолган россиялик Москва судида пайдо бўлди. У давлатга хиёнат иши бўйича ҳибсга олинган. Бу ҳақда Медиазона ёзмоқда.
Унда айтилишича, Россиянинг Украинага босқинидан сўнг Георгий Пирогов исмли шахс Россияни тарк этган ва Грузияда саноат алпинисти бўлиб ишлаётган бўлган.
6 июль куни эса Ўзбекистоннинг Қўнғирот шаҳрига хизмат сафари билан келиб, сўнг тўсатдан ғойиб бўлган. Тез орада қидирувга берилган Пироговнинг машинаси Қўнғиротдан 90 километр узоқликда жойлашган Қорақалпоғистон Республикаси пойтахти Нукус шаҳридан топилади. Аммо унинг ўзи Россия пойтахти Москвада экани хабар қилинади.
“Москванинг Мешчанский туман суди Георгий Пирогов исмли шахсни давлатга хиёнат қилишда айбланиб (Жиноят кодексининг 275-моддаси) тергов изоляторига юборган. Ҳукм 8 июль куни тушдан кейин Москва судларининг веб-сайтига жойланган, бироқ, орадан кўп ўтмай ўчириб ташланган.
Жиноят иши қўзғатилишига аниқ нима сабаб бўлгани номаълум. Мешчанский судида ҳибсга олиш иши бўйича тергов федерал тергов бошқармаси томонидан эмас, балки Федерал хавфсизлик хизмати нинг (ФСБ) Москва ва Москва вилояти бўйича бошқармаси томонидан олиб борилаётганлигини англатади”,
деб ёзилган маъқолада.
Пироговнинг қариндошларидан олинган маълумотларга кўра, эркак у ердан Грузияга учиш учун Бухорога боришни режалаштирган бўлган. Аммо ҳозир Матросская Тишина тергов изоляторида сақланмоқда. Унинг Ўзбекистондан Россияга қандай қилиб келиб қолгани, ким қўлга олгани ҳали номаълум.