Бугун, 29 март куни Ўзбекистон Ички ишлар вазирлиги республика ҳудуди бўйлаб одамлар гавжум жойларда кучайтирилган тартиб жорий этилганини эълон қилди.
Унга кўра, эндиликда маданий кўнгил очар масканлари, йирик савдо марказлари ва деҳқон бозорлари, қолаверса хиёбонлар, спорт иншоотлари ҳамда масжидлар атрофида назорат кучайтирилади.
“Гувоҳи бўлаётганимиздек, замонамизда рўй бераётган аянчли воқеликлар макон ёки жой, миллат ёки ёш танламаяпти. Биз тинч ва осойишта, дориламон кунларда яшар эканмиз, юртимизни турли ташқи таъсирлардан, ёмон ниятли кимсалардан ҳимоя қилишга ўзимизни дахлдор ҳис этишимиз муҳим ҳисобланади.
Яқин ўтмиш халқимиз учун изтиробли, аламли хотиралар билан муҳрланган 16 февраль воқеаларига, Сариосиё туманидаги террористик таҳдидларга, Андижондаги хунрезликларга гувоҳ бўлган. Ғаразгўй, ватансиз кимсаларнинг бу ҳаракати тарихга қонли террор сифатида муҳрланган”, – дея ёзилган Ички ишлар вазирлиги маълумотида.
Вазирлик бу каби кўнгилхираликлар дунёнинг бошқа ривожланган давлатларида ҳам кўп бора содир бўлганини алоҳида қайд этар экан, айрим давлатлар ҳалигача уруш алангасида қолаётганини эслатган ва фуқароларни огоҳликка чақирган.
- «Жамоат жойларида шубҳали кўринган шахсларга эътибор қаратишимиз ҳамда улар ҳақида зудлик билан ҳуқуқни муҳофаза қилувчи органларга хабар беришимиз муҳим.
- Ундан ташқари, турли манзилларда қаровсиз қолдирилган ҳар қандай буюмни эътибордан четда қолдирмасдан, улар ҳақда дарҳол 102 рақамига хабар бериш лозим.
- Ва албатта, жамоат жойларида хизмат вазифасини бажариб, жамоат хавфсизлигини таъминлаётган ҳуқуқ посбонларининг қонуний талабларини эътирозсиз бажариш зарур”, – деган вазирлик.
Шунингдек, Самарқандда ҳам жамоат жойларида хавфсизлик чоралари кучайтирилгани ҳақида хабар қилинди.
Маълумот учун, 22 март куни Россия пойтахти Москвада террорчилик ҳаракати содир бўлгач, мамлакат бўйлаб хавфсизлик чоралари кучайтирилган эди.
Кўп ўтмай Туркия ҳам худди шундай кучайтирилган табдирларни жорий этди.