Россия Афғонистондаги “Толибон”ни террорчилик ҳаракати ташкилоти сафидан чиқариши мумкинлигини билдирмоқда. АҚШ Россиянинг бу ҳаракати яхшиликка олиб келмаслигини айтмоқда. Сўнгги йилларда яқин алоқа ўрнатиб келаётган Ўзбекистон бу борада қандай позицияда?
Россиянинг Афғонистон бўйича дипломати Замир Кобуловнинг маълум қилишича, Россия Федерацияси Ташқи ишлар ва Адлия вазирлиги Путинга “Толибон” ҳаракатини террорчи ташкилотлар рўйхатидан чиқаришни тавсия қилган. Бу ҳақда ТАСС хабар берди.
Адвокат Дмитрий Аграновскийнинг ТАССʼга маълум қилишича, “Толибон” ҳаракатини (Россия Федерациясида) террорчилик ташкилотлари рўйхатидан чиқариб ташлаш фақат Россия Олий Судининг қарори билан амалга ошади.
Россия Ташқи ишлар вазири Сергей Лавровнинг айтишича, “Толибонни террорчи ташкилотлар рўйхатидан чиқариб ташлаш ташаббуси объектив воқеликни акс эттиради.
“Толибон” Афғонистондаги ҳақиқий куч ва реал ҳокимият ҳисобланади. Россия Федерацияси бунга бефарқ эмас”,
деган у.
Бундан ташқари, Медведовнинг ТАССга берган интервьюсида Россия “Толибон” ҳукумати билан кенг кўламли муносабатлар ўрнатишга яқинлигини айтган.
Аммо, Қўшма штатлар Россия Толибонни тан олиш ниятида эмаслигини маълум қилган. Оқ уй Миллий хавфсизлик кенгашининг стратегик алоқалар бўйича координатори Жон Кирбининг қўшимча қилишича, Россия ҳаракатни тан олиши “бошқаларга ёмон сигнал” бериши мумкинлигини айтган.
Россия етакчиси Путин Ўзбекистонга давлат ташрифини якунлаш арафасида журналистлар билан ташкил этилган учрашувда Афғонистонда муаммолар борлигини ва буни инкор этиб бўлмаслигини айтган.
У бу ҳақда изоҳ бермаслигини, шунингдек, «Толибон» ва Афғонистон масаласи доимий кун тартибида турганини таъкидлаган.
Сиёсатшунос Суҳроб Бўронов эса, Кремль маъмурияти “Толибон” билан янада яқинлашишга, катта эҳтимол билан Афғон сиёсий саҳнасида муҳим ўйинчига айланиш истаги мавжудлиги аён бўлаётганини айтган.
Россия “Толибон”ни террорчи ташкилотлар рўйхатидан чиқармоқчи. Бу орқали Федерация Афғонистон билан алоқаларни янада мустаҳкамлашга ҳаракат қилади. Аммо бу рус ҳукуматининг “Толибон”ни давлат сифатида тан олишини билдирмайди”,
деди сиёсатшунос Суҳроб Бўронов.
Uzdiplomat.uz Ўзбекистон Ташқи ишлар вазирлиги билан боғланганида вазирлик Ўзбекистон ҳеч қачон “Толибон”ни террорчи ташкилот сифатида кўрмаганлигини айтган.
Ўзбекистон Афғонистон билан доимо ижтимоий-иқтисодий ҳамкорлик қилиб келган”,
деди Ташқи ишлар вазирлиги матбуот котиби Аҳрор Бурҳонов.
Эслатиб ўтамиз, дунёдаги аксар мамлакатларда террор ташкилоти деб топилган “Толибон” ҳаракати 2021 йил августида Кобулни эгаллаб олиб, Афғонистон бўйлаб ўз ҳукмронлиги ўрнатган эди. Ўшанда Афғонистон “Ислом амирлиги” деб эълон қилинган.