2023 йилнинг 22 сентябрида «Буюк Ипак йўли» метро бекатида юзни сканер қилиш (Face ID) орқали тўловни амалга ошириш тест режими ишга туширилган эди.
Аммо мазкур тизим тест режимида бўлсада тўлиқ ишлаётгани йўқ.
Қачон метроларда йўловчиларнинг вақтини тежовчи Face ID тизимига тўлиқ ўтилади? Uzdiplomat.uz мухбири мазкур савол билан Транспорт назорати инспекцияси раҳбарияти иштирокидаги матбуот анжуманида мутасаддиларга юзланди.
Унда маълум қилинишича, метроларда Face ID тизимига қачон тўлиқ ўтилиши ҳозирча номаълум.
“Урғу фақат тест режимига берилган. Бу янги тизим, хато ва камчиликларини бартараф этиш учун кўп вақт кетади. Мазкур тест режими қачонгача давом этиши ҳозирча аниқмас”,- деди Тошкент метрополитени матбуот котиби Тўйчи Мирзаев.
Тошкент Метрополитени хизмат бошлиғи ўринбосари Aбдутоҳир Абдуқодиров эса “Буюк ипак йўли” бекатида Face ID ишламаётганини рад этди.
«Бу жараёнлар тест режимда ҳозир ҳам ишламоқда. Бундан ташқари яна кафт билан тўловни амалга ошириш тизими ҳам бекатларимизда тест режимда мавжуд»,-деди у.
2023 йилнинг 30 ноябрида “Халқлар дўстлиги” метро бекатида кафт орқали тўловни амалга ошириш тизими ишга туширилганлиги ҳақида хабар берилган эди. Лекин бугунги кунга қадар бу тизим ишламаган. Ўшанда тизим АТТО компанияси билан ҳамкорликда ишлаши маълум қилинган.
Ушбу қурилмаларнинг бугунги кунда ишламаётгани ва қурилма ўрнатилгандан буён қанча муддат ишлаганлигини аниқлаш учун “Тошкент метрополитени” ДУК га мурожаат қилганимизда бу саволга АТТО компанияси жавоб беришини маълум қилишди.
АТТО компанияси эса мазкур саволларга уч кун ичида жавоб беришини айтди.