Суратларда кўриниб турганидек, таъмирлаш ишлари пишиқ ғиштлар билан амалга оширилмоқда.
Тарихчи олим Элдар Асановнинг айтишича, аслида таъмирлаш эмас, реставрация ишлари олиб борилиши керак бўлиб, бунда қоидаларига биноан пишиқ ғишт эмас, балки «мусулмон» ғишт деб аталувчи ғиштлардан фойдаланиш мақсадга мувофиқ. – Лекин, бу ғишт бизда ишлаб чиқарилмайди, шу сабабдан унинг ўрнига пишиқ ғишт ишлатишга мажбур бўлишаяпти, шекилли, – дейди олим. – Энг катта муаммо бу эмас, таъмирлашлар сабабли қадимий ёзувлар, нақшлар йўқ бўлиб кетаяпти. Ёзувларни ўрнига шунчаки қуйма шаклларни олиб келиб қўйишаяпти, бўлди. Бунинг оқибатида минглаб ёзувларни йўқотдик.
Вазирлар Маҳкамасининг қарорида «Арк қўрғони»нинг бундан 100 йил олдин вайрон қилинган қисмларини қайта тиклаш, консервация қилиш хорижий малакали соҳа мутахассисларини жалб қилган ҳолда ишлаб чиқиш, лойиҳаларни тегишли хорижий ҳамда маҳаллий тузилмалар билан келишилишини таъминлаш ҳамда экспертлар хулосалари асосида ташкил этиш алоҳида кўрсатиб ўтилган.
2022 йилда Бухоро амирининг ёзги қароргоҳи — Ситораи Моҳи Хосса тарихий мажмуасида реставрация ишлари қўйилган талаблар бузилган ҳолда нотўғри бажарилгани сабабли бинонинг бир қисми тарихий қийматини йўқотгани айтилганди.
Маълумот учун, Ўзбекистонда 1996 йил Бухоро шаҳрининг 2500 йиллиги нишонланган, юбилей муносабати билан кенг қурилиш ва таъмирлаш ишлари ташкил этилган эди. Ўшанда Арк қўрғоннинг жанубий қисми деворлари илмий асосда инженерлик технологияларидан фойдаланиб мукаммал таъмирдан чиқарилган,
Аркнинг шимолий девори ҳам қисман мустаҳкамлаш таъмиридан ўтказилган.
Археология манбаларига кўра, Бухоро Арки эрамиздан аввалги III асрда барпо этилган.
Эслатиб ўтамиз, 1920 йилда Бухоро амирлиги ҳудудига Фрунзе бошчилигидаги қизил армия бостириб киради. Шаҳар қамали вақтида аэропланлардан бомба ёғдирилади ва шаҳардаги кўплаб бинолар, масжид ва мадрасалар вайрон қилинган эди. Хусусан, Арк қўрғонининг аксарият қисми харобага айланган.