Самарқандда собиқ «Bатапарвар» ходими ССCРни қайтадан тузишга уринганликда айбланиб жиноий жавобгарликка тортилди. Бу ҳақида Олий Cуд матбуот котиби Азиз Обидов хабар берди.
Қайд этилишича, ушбу ҳаракатнинг ташкилотчиси Ўзбекистонда “Ватанпарвар” ташкилотидан 2011 йилда нафақага чиққан. Кейинчалик СССРни қайта тиклаш ғояси билан шуғуллана бошлаган.
Э.Х. Telegram’даги “Узбекская ССР/СССР” гуруҳида СССРни тиклашга чақирувчи материаллар жойлаган. Унда собиқ Совет Иттифоқи расман тарқалмаган ва унинг таркибидаги республикалар шу жумладан, Ўзбекистон ҳам АҚШ кўмагида мустақиллик эълон қилганини айтган. Тез орада эса улар СССРга қайта қўшилишлари мумкинлигини билдирган.
“Узбекская ССР/СССР” гуруҳи текширилганда Э.Х. томонидан СССРни қайта тиклашга чақирувчи видео ва аудио материаллар жойланганлиги аниқланган.
Экспертиза хулосаларига кўра, бу материаллар Ўзбекистон давлат тузумини Конституцияга хилоф тарзда ўзгартиришга чақирувчи ғояларни қамраб олган.
Э.Х. Олег Туришкин билан суҳбатда бўлганини ва унинг таъсири остида Telegram орқали мунтазам алоқа ўрнатганини айтган. Туришкин унга СССР фуқароси сифатида рўйхатга олингани ҳақида маълумот берган. Шунингдек, “Гос.реестр СССР” гуруҳига қўшган. Сўнг, Туришкин Э.Х.га почта орқали “СССР фуқароси” ҳақидаги гувоҳномани юборган.
2022 йилда Э.Х. YouTube’даги “Просвещения” гуруҳига аъзо бўлган ва у ерда СССРни қайта тиклаш ва Совет давридаги мунозарали воқеалар ҳақида муҳокамаларда қатнашган.
2023 йил 3 январ куни Э.Х. Самарқанддан Москвага борган ва у ерда СССРни қайта тиклаш ғояси тарафдорлари билан учрашган. Улар СССР ҳануз тарқалмаганини, Иосиф Сталин давридаги қонунларга қайтиш режаси борлигини ва 15 давлатни бирлаштирмоқчилигини маълум қилган. Шу билан бирга, уни Самарқанд вилояти бўйича “ВКПб” секретари этиб тайинлаган.
Унга 3 йил муддатга озодликни чеклаш жазоси тайинланган. Шу билан бирга, унга назорат органи розилигисиз яшаш жойини ўзгартирмаслик, Самарқанд вилояти ҳудудини тарк этмаслик ва алоқа воситалари ҳамда интернетдан фойдаланмаслик каби чекловлар қўйилган. Суд Э.Х.ни Ўзбекистон Республикасининг амалдаги давлат тузумини Конституцияга хилоф тарзда ўзгартиришга, ҳокимиятни босиб олишга даъват қилиш билан боғлиқ жиноятни содир этганликда айбдор деб топди.