Марказий Осиё текислик ҳудудларида ҳаво ҳарорати 44-46°С га, баъзи ҳолларда, +48°С гача етиши мумкин. Cув сатҳининг кескин пасайиши ва энергетик тизимда кучли зўриқиш.
2024 йилда Ўзбекистонда доимгидан иссиқ ёз кузатилиши мумкин. Бу Гидрометеорология илмий тадқиқот институтининг таҳлиллари давомида маълум бўлган.
Унга кўра, Республиканинг ғарбий қисми ва чўлларида ёзги мавсумда ҳарорат режими кўп йиллик ўртача қийматдан 1ºС – 1.25ºС юқори бўлиши кутилмоқда. Қолган ҳудудларда мавсумий ҳаво ҳарорати кўп йиллик ўртача қийматлардан бироз юқори (0.75ºС – 1.ºС) бўлиши прогноз қилинмоқда.
Июль ва август ойининг бошларида ғайритабиий (аномал) иссиқлик даврлари кузатилиши, баъзи кунларда ҳарорат узоқ муддатли ўртача қийматлардан сезиларли даражада кўтарилиши мумкин.
“28 май куни Тинч океанида узоқ давом этган Эль-Ниньо ҳодисаси фаоллиги аста-секин сўниб, ўз ўрнини Ла-Ниньо ҳодисасига бўшатиб бериши маълум бўлган. Дунёда 10 ой давом этган Эль-Ниньо ҳодисасидан сўнг Тинч океани маркази ва шарқий қисмларида сув ҳароратининг барқарор пасайиб бориш ҳодисалари кузатила бошламоқда.
Термик депрессиянинг давомийлиги 2-3 суткадан 5-7 суткагача, баъзи йилларда эса 1,5–2 ҳафтагача давом этиши мумкин”,
дейилади хабарда.
Бунинг оқибатида эса, Ўзбекистон, шунингдек, минтақа мамлакатларида қишлоқ хўжалиги, иқтисодиёт тармоқлари ҳамда энергетик тизимда кучли зўриқишлар кузатилади. Айниқса, дарё ва денгиз ҳудудларида сув сатҳининг кескин пасайиши эҳтимоли юқори.
“Жорий йилнинг июнь – август ойларида Тинч океанида Ла-Ниньо ҳодисасининг тўлиқ шаклланиши 50%, июль – сентябрда 60% ҳамда август – ноябрда 70% эҳтимолликда ривожланиши прогноз қилинмоқда. 2024 йилнинг ноябрь ойидан 2025 йилнинг январь ойи оралиғида мазкур ҳодиса ўзининг фаол ривожланиш босқичига ўтади”,
дея қўшимча қилинган хабарга.
Қайд қилинишича, иссиқ ёз Ўзбекистон иқлими учун тез-тез учрайдиган ҳодиса. Бунда жануб ва чўл ҳудудларида +40…+45 даражагача, қолган ҳудудларда эса +40…+42 даражагача иссиқ бўлади. Энг иссиқ ҳаво ёз ойида одатда 5-7 кун давом этадиган термал тушкунлик билан боғлиқ ва бундай ҳолат 2-3 маротаба кузатилади.
Маълумот учун, “Эль-Ниньо” (испанча – болакай) об-ҳаво феномени ўртача 2-7 йилда бир марта содир бўлади ва одатда 9 ойдан 12 ойгача давом этади. Бу Тинч океани марказий ва шарқий тропикларида сув юзасидаги ҳароратнинг кўтарилиши билан боғлиқ иқлим режими ҳисобланади. “Эль-Ниньо” дунёнинг кўплаб қисмлари ва океан минтақаларида ҳарорат рекордлари ва ҳаддан ташқари иссиқ об-ҳаво шароити эҳтимолини сезиларли даражада оширади.