Ўзбекистонга 2023 йил январь-декабрь ойларида 30 та давлатдан умумий қиймати 197 млн 842 минг доллар миқдоридаги гуманитар ёрдам юклари жўнатилган. Бу маълумот Иқтисодиёт ва молия вазирлигининг давлат мақсадли жамғармаларининг 2023 йилги ижроси бўйича ҳисоботида маълум қилинди.
Энг кўп ёрдам кўрсатган давлатлар учлигига Германия (71 млн 379,4 минг доллар ёки жами ёрдамнинг 36 фоизи),
Хитой (27 млн 467,6 минг доллар, 13,9 фоиз),
АҚШ (23 млн 234,2 минг доллар, 11,8 фоиз) кабилар киради.
Шунингдек, Бельгия (22 млн 620,2 минг доллар, 11,4 фоиз), Швецария (20 млн 757,8 минг доллар, 10,5 фоиз) ҳам энг кўп ёрдам жўнатишган. Умумий гуманитар ёрдамнинг 83,63 фоизи юқоридаги бешта давлатга тегишли.
Кириб келган гуманитар ёрдам соҳалар кесимида таҳлил қилинганда, эн кўп соғлиқни сақлаш (169 млн 233,5 минг доллар), ижтимоий соҳа(1 млн 244,4 минг доллар), экология ва атроф-муҳитни муҳофаза қилиш (943,2 минг доллар) ва таълимга (247,2 минг доллар) йўналтирилганини кўриш мумкин.
Бундан кўринадики, кириб келган гуманитар ёрдамнинг 85,5 фоизи соғлиқни сақлаш соҳасига тўғри келади.
Ушбу даврда кириб келган гуманитар ёрдамлар гуманитар ёрдам олувчи ташкилотлар салмоғига нисбатан таҳлил қилинганда
ССВ ҳузуридаги Санитария-эпидемиологик осойишталик ва жамоат саломатлиги хизматига 58,2 фоиз,«Таъминот ва логистика хизмати» унитар корхонасига 17,2 фоиз, Гематология илмий тадқиқот институтига 10,5 фоиз,
«Соғлом авлод учун» халқаро хайрия фондига 11,2 фоиз улуш тўғри келади.
2024 йил I чорагида эса ёрдам кўрсатувчилар географияси камайганини кўриш мумкин. Бу йил Ўзбекистонга 14 та давлатдан умумий қиймати 12 миллион 277,4 минг АҚШ доллар миқдорида гуманитар ёрдам юклари кириб келган бўлиб, унинг асосий салмоғи Америка Қўшма Штатлари – 8 766,9 минг АҚШ доллар (71,4 %), Нидерландия – 2 878,9 минг АҚШ доллар (23,5 %) давлатларига тўғри келади. Яъни умумий гуманитар ёрдамнинг 94,85 фоизи юқоридаги иккита давлатга тегишли.
Маълумот учун, ҳисобот даврида Ўзбекистон томонидан Афғонистон, Украина, Қозоғистон каби давлатларга гуманитар юклар жўнатилган.