Uzdiplomat.uz “Уни танийсизми?” лойиҳаси орқали давлат амалдорларининг халққа қай даражада таниш экани ҳақида сўровнома ўтказмоқда. Лойиҳанинг бу галги қаҳрамони Пўлат Бобожонов.
Хоразмда ҳоким, Бухоро ва Жиззахда прокурор вазифасида ишлаган, бугунги кунда Ўзбекистон Ички ишлар вазири лавозимида фаолият юритиб келаётган Пўлат Бобожоновни одамлар танийдими?
Сўровнома натижаларига кўра, одамлар Пўлат Бобожоновни шоир, ёзувчи, депутат ҳамда ҳоким деб айтишди.
“Пўлат Бобожонов менимча ёзувчи бўлса керак, аммо асарлари ҳақида хабарим йўқ”,
дейди аёл.
Бошқа бир сўровнома қатнашчиси эса, Пўлат Бобожонов “Миллий тикланиш” партияси раиси бўлса керак, деб тахмин қилди.
“Бу киши “Миллий тикланиш” партияси раиси бўлса керак”,
дейди респондент.
Яна бошқа бир иштирокчи , Пўлат Бобожоновни танимаслигини, фақат Расул Кушербоевни билишини айтди.
“Пўлат Бобожоновни танимаймиз, биз халқнинг тарафини кўпроқ оладиган Расул Кушербоевни таниймиз»,
деди респондент.
Шунингдек, сўровнома қатнашчилари орасида Пўлат Бобожоновни умуман танимаганлар ҳам бўлди.
“Пўлат Бобожонов ҳақида эшитмаганман ҳам, танимайман ҳам”,
деб жавоб берди аёл.
Маълумот учун,Пўлат Бобожонов – 1983 йилда ўз фаолиятини бошлаган бўлиб, 10 йилча Хоразм вилояти прокуратура органларида, кейин эса ҳокимият тизимида ишлаган.
- 2000−2005 йилларда Ўзбекистон Бош прокурори ўринбосари бўлган.
- 2005−2006 йилларда Бош прокуратуранинг Солиқ ва валюта жиноятларига қарши курашиш департаменти бошлиғи сифатида фаолият юритган.
- 2006−2011 йилларда Жиззах вилояти прокурори, кейин эса қисқа муддат Бухоро вилояти прокурори, Хоразм вилояти ҳокимининг биринчи ўринбосари каби вазифаларда ишлаган.
- 2012 йилдан то 2017 йилгача беш йил давомида Хоразм вилояти ҳокими лавозимида фаолият олиб борди.
- Пўлат Бобожонов Ички ишлар вазири лавозимига 2017 йилда тайинланган.
Эслатиб ўтамиз, аввалроқ Бахтиёр Саидов, Алишер Қодиров, Очилбой Раматов бўйича сўровнома ўтказгандик.
Хўш, сиз-чи, Пўлат Бобожоновни танийсизми?