Бугун 10 апрель Абдулла Қодирий таваллуд топган кун. Бу йил ХХ аср ўзбек адабиётининг ёрқин намояндаси, ўзбек романчилиги асосчиси бўлган адибимизнинг 130 йиллиги нишонланмоқда.
Абдулла Қодирий 1937 йилнинг 31 декабрида “халқ душмани” сифатида ҳибсга олинади. 1938 йилнинг 4 октябрида ёзувчи 9 ойлик хўрликлардан сўнг Чўлпон, Фитрат каби маслакдошлари билан биргаликда отиб ташланади.
2000 йилда эрксевар аждодларимиз қатл қилинган Тошкент шаҳрининг Юнусобод туманидаги Бўзсув бўйидаги масканда Шаҳидлар хотираси ёдгорлик мажмуаси қад ростлаган.
Шаҳидлар хотираси хиёбони бугун одамлар билан тўла. Лекин уларнинг аксарияти Қодирийни хотирлаш учун эмас, балки байрам баҳона чиройли гўшада дам олгани келишган.
Хўш улар, миллат учун жон фидо қилган Қодирийнинг туғилган куни бугун, 10 апрель эканини билишадими, хиёбон тарихини-чи?
Uzdiplomat.uz мухбири юқоридаги савол билан пойтахт аҳолиси ва меҳмонларга юзланди.
Шаҳар аҳолиси ва меҳмонлари берган жавоблар эса инсонни маҳзун этади. Уларнинг кўпчилиги, Қодирийнинг туғилгани эмас, ҳатто унинг асарларини ҳам билишмайди. Афсуски, Қодирий шахсини танимайдиганлар ҳам топилди.
““Ўтган кунлар” шеъри ёдимда”,- дея жавоб берган сўровнома иштирокчиларидан бири.
20 га яқин инсон иштирок этган ушбу сўровномада фақатгина бир кишидан биз тўлиқ жавоб олдик холос.
“Бугун Абдулла Қодирийнинг туғилган куни, Меҳробдан чаён, Ўтган кунлар романлари муаллифи”-деди респондентлардан бири.
Ҳатто ўзлари айланиб юрган Шаҳидлар хотираси майдони билан боғлиқ саволимиз ҳам очиқ қолди.
Батафсил видеода кўринг.