Бехзод Мусаев бошқараётган вазирлик, Шавкат Абдураззоқов ҳокимлиги ҳам улар қаторида бор.
Ўзбекистонда коррупцияга қарши самарасиз курашаётган ва жамоатчиликка ёпиқ бўлган 40 га яқин давлат органлар бор
Коррупцияга қарши курашиш агентлиги давлат органлари ва ташкилотларининг “Очиқлик индекси –2023” рўйхатини ва уларнинг коррупцияга қарши курашиш самарадорлик даражасини эълон қилди.
Унга кўра, Ўзбекистонда 8 та вазирлик, 3 та агентлик , 3 ҳокимлик ва яна қатор давлат ташкилотларининг очиқлик даражаси қониқарсиз, 2 та вазирлик, 4 та агентлик ва 4 та инспексиянинг коррупцияга қарши курашиш самарадорлиги эса етарли эмас деб топилди.
Ҳам жамоатчиликка ёпиқ бўлган, ҳам коррупцияга қарши курашолмаётган давлат органлари сафида Киноматография агентлиги, Электр-энергияси, нефт махсулотлари ва газдан фойдаланишни назорат қилиш инспекцияси, Тоғ-кон геология ва саноат хавфсизлигини назорат қилиш инспексияси ҳамда Андижон вилоят ҳокимлиги турибди.
Соғлиқни сақлаш вазирлиги, Фавқулодда вазиятлар вазирлиги, Энергетика вазирлиги, Қишлоқ хўжалиги вазирлиги, Ташқи ишлар вазирлиги, Спорт вазирлиги, Камбағалликни қисқартириш ва бандлик вазирликлари очиқлик индексида 55 баллдан паст балл олиб, “қизил” рўйхатга тушган.
Шунингдек, Олий суд, Судялар олиш кенгаши, Мактабгача таълим агентлиги, “Тошшаҳартрансхизмат”, Транспорт назорати инспексияси, “Uzbekistan Airways” АЖ, Мажбурий ижро бюроси, “Йўлқурилиш” АЖ, “Ўздонмаҳсулот” АК, “Ўзбектелеком”, Иқтисодий жиноятларга қарши курашиш департаменти, “Пойтахтбанк” АЖ, “Ўзмахсусмонтажқурилиш” АК, Ўзбекистон миллий телерадиокомпанияси ҳам маркур рўйхатдан жой олган.
“Қизил” тоифада баҳоланганларига қонунчиликда белгиланган тартибда интизомий жазо чорасини қўллаш юзасидан таклиф киритиш, очиқликни таъминлашда йўл қўйилаётган тизимли камчиликларни ўрганиш, бартараф этиш ҳамда уларнинг ушбу йўналишдаги фаолиятини яхшилаш бўйича чора-тадбирлар дастурини ишлаб чиқиш кўзда тутилмоқда. Шунингдек, Вазирлар Маҳкамаси Раёсати ва Олий Мажлис Сенати мажлисларида ушбу тоифада баҳоланган давлат органлари ва ташкилотлари раҳбарларининг очиқлик соҳасида йўл қўйган камчиликлари ва уларни бартараф этиш бўйича режалаштирган чора-тадбирлари юзасидан ахбороти эшитилади”, – дейилган Коррупцияга қарши курашиш агентлиги хабарида.
Олий таълим, фан ва инновациялар вазирлиги, Ёшлар ишлари агентлиги, Қишлоқ хўжалигида хизматлар кўрсатиш агентлиги, Сув хўжалиги обьектлари хавфсизлигини ва сувдан фойдаланишни назорат қилиш инспексияси, Агросаноат мажмуи устидан назорат қилиш инспексияси, Ипакчилик ва жун саноатини ривожлантириш қўмитаси, Сурхондарё вилоят ҳокимлиги каби давлат органлари ва ташкилотларининг коррупцияга қарши курашиш самараси ҳам 55 баллдан паст баҳоланиб, “қизил” тоифага киритилган.
“Коррупцияга қарши курашиш тизимини йўлга қўйиш бўйича тегишли ишлар амалга оширилмаганлиги, жумладан фаолиятида коррупциявий хавф-хатарлар аниқланмаганлиги, ишга қабул қилиш, лавозимга тайинлаш ва харидлар жараёнида манфаатлар тўқнашувини олдини олиш ва аниқлаш билан боғлиқ чоралар амалга оширилмаганлиги, коррупция ҳақида хабар бериш бўйича алоқа каналларининг йўлга қўйилмаганлиги, ушбу йўналишдаги ҳужжатлар ижро этилмаганлиги, коррупцияга қарши курашиш тизимини жорий этишга етарлича эътибор қаратилмаганлиги ташкилотлар фаолияти қониқарсиз баҳоланишига сабаб бўлди”, – дея ёзган Коррупцияга қарши курашиш агентлиги.