«Ташаббусли бюджет» лойиҳаларига овоз тўплаш ишларига ўқитувчилар жалб қилинаётгани ҳақида ижтимоий тармоқлар ва ОАВда кўплаб мисоллар келтирилди.
АОКАда Мактабгача ва мактаб таълим вазирлигининг 2023 йилги якуний ҳисоботи юзасидан ўтказилган матбуот анжуманида Uzdiplomat.uz мухбири шу ҳолатга мутасаддиларнинг муносабати қандайлиги билан қизиқди.
Мактабгача ва мактаб таълим вазири ўринбосари Сарвар Раджабов саволга жавоб берар экан, “ташаббусли бюджет”га қатнашиш ёки қатнашмаслик бўйича вазирлик ҳеч кимга топшириқ бермаганини таъкидлади.
“Ўқитувчиларни овоз йиғишга мажбурлаётган ҳокимият бўладими, директор бўладими. Ким бўлса ҳам блогерлар ёки журналистларда бу тўғрисида маълумот бўладиган бўлса, бизга хабар берсангиз, вазирлик томонидан доимий равишда кескин чоралар кўрилади”,-деди Сарвар Раджабов.
Ўқитувчиларни овоз йиғишга жалб қилиш мажбурий меҳнатнинг кўриниши эмасми, деган саволга жавобан эса Раджабов вазирликнинг позициясини қайта эслатиб ўтди.
“Вазирликнинг позицияси шундаки, фақат «опен бюджет»да эмас, умуман педагогларни ўзининг ишидан ташқари бошқа ишларга жалб қилиш мумкин эмас деган позицияда турамиз”, – деди Вазир ўринбосари.
Стратегик ривожлантириш ва халқаро рейтинглар бошқармаси бошлиғи Лазиз Хўжақулов эса берилган жавобга қўшимча киритаркан молиялаштириш манбалари ҳар хиллигини айтиб ўтди ва буни мажбурий меҳнат эмас, имконият деб ҳисоблаш кераклигига урғу берди.
“Бу ерда молиялаштириш манбалари ҳар хил бўлади. Маҳаллий ҳокимлик молиялаштириш манбалари бор. Республика бюджетидан молиялаштириш бор. Масалан, энди кўпроқ инфраструктура томонидан қарайдиган бўлсак. Мана шу белгиланган молиялаштириш ҳар йили режалаштирилади. Масалан, қайсидир мактаб қурилади, қайсидир мактаб таъмирланади. «Опен бюджет» фақат мактаблар учун эмас”, -деди Лазиз Хўжақулов.
У «опен бюджет»аслида бир пойгалиги ва бу яна бир имконият эканлигини ва мактаб учун куйинмайдиган ўқитувчиларни психологик томонлари борлигини айтиб ўтган.
“Опен бюджет» аслида бу бир пойга тўғрими? Масалан, бюджетнинг қайсидир қисми ажратилиб чиқарилди ва шу бюджетни олиш керак. Тўғрисини айтай ўқитувчиларнинг юзтасидан 90 таси мактаб учун куйинади. Овоз йиғиш учун ҳаракат қилади. 3 та 4 таси куйинмайди. Энди бунинг амалий психологик томонлари бор. Сиз ҳам бир мактабда директор бўлсангиз, битта ўқитувчи менга ёрдам бермайди деб оёқ тираб олса, балки сиз унга негатив муносабатда бўласиз, мен бу билан мажбурламасин демоқчимасман. «Опен бюджет» бу яна битта имконият. Буни унақа мажбурий меҳнат деб айтиш мумкин эмас”, – деди Стратегик ривожлантириш ва халқаро рейтинглар бошқармаси бошлиғи Лазиз Хўжақулов.
У «опен бюджет»аслида бир пойгалиги ва бу яна бир имконият эканлигини ва мактаб учун куйинмайдиган ўқитувчиларни психологик томонлари борлигини айтиб ўтган.
У шунингдек, ҳар қандай янги тизим ишга тушганида, албатта қандайдир муаммо бўлишини ва бунинг доим салбий томонларига қараш керак эмаслигини эслатди.
Таълим сифатини баҳолаш, лицензиялаш ва аккредитациялаш департаменти директори Сардор Раҳимбоев эса вазирлик мутахассиси сифатида эмас, бир ота сифатида юқоридаги саволга ўз муносабатини билдиришини алоҳида таъкидлади.
“Вазирлик мутахассиси сифатида эмас, ота сифатида жавоб берай. Мен ота сифатида фарзандимнинг ўқитувчиси телефон қилиб шунга овоз беринглар деса мен жоним билан овоз бераман. Шунга ёрдам бераман. Чунки шу фарзандимга яхши шароитда янги нарса олинишига мен ота сифатида тайёрман”,- деди Сардор Раҳимбоев.