Халқаро рейтингда эса наркотик истеъмол қилиш энг кам бўлган мамлакатлардан бири деб топилди.
Ўзбекистонда 2023 йилда 6 202 нафар шахс Жиноят кодексининг 270, 271, 273, 274, 275 ва 276-моддаларида назарда тутилган гиёҳвандлик воситалари ёки психотроп моддалар билан қонунга хилоф равишда муомала қилишдан иборат жиноятларни содир этганликда айбдор деб топилиб, судланган. Бу ҳақда Олий суд матбуот котиби Азиз Обидов маълум қилди.
Қайд этилишича, уларнинг 2 412 нафарига озодликдан маҳрум қилиш жазоси, 3 790 нафарига эса озодликдан маҳрум қилиш билан боғлиқ бўлмаган жазолар тайинланган.
«Бундан ташқари 13 нафар шахсга нисбатан тиббий йўсиндаги мажбурлов чоралари қўлланилган», — дейилган хабарда.
Шу кунларда эълон қилинган World Population Review дунё бўйлаб наркотик истеъмол қилиш рейтингида Ўзбекистон 95-ўринни эгаллади. Бу кўрсаткич билан Марказий Осиёнинг беш республикасида охирги ўринда турибмиз.
Гиёҳванд моддалар энг кўп истеъмол қилинадиган давлат — АҚШ. Ундан кейинги ўринларни Эстония, Беларус, Монголия, Канада, Россия каби давлатлар эгаллаган.
Гиёҳванд моддалар истеъмоли бўйича Қозоғистонда хавотирли натижа – 8-ўрин, Қирғизистон 23-ўрин, Туркманистон 41-ўрин ва Тожикистон 76-ўринда қайд этилган.
Маълумот учун, 2023 йилда Ўзбекистон божхоначилари томонидан 9,2 тоннага яқин гиёҳвандлик воситалари ва 663 минг дона психотроп ва кучли таъсир этувчи моддалар мусодара қилинган. Бу аввалги йилдагига нисбатан 12,3 баробарга кўп бўлиб, 2022 йилда 749 кг гиёҳвандлик воситалари, 308 минг дона кучли таъсир этувчи воситалар ва 5 000 бирлик психотроп моддалар мусодара қилинган.