BBC News Uzbek журналисти Ибрат Сафо Ўзбекистонда ИИБга чақирилгани, ИИБ ходими эса ундан ватанпарвар – “патриот” бўлишни сўрагани ҳақида хабар берган эди.
Журналистнинг ИИБ чақирилиши ижтимоий тармоқларда катта муҳокамаларга сабаб бўлди.
Ҳатто Буюк Британинг Ўзбекистондаги элчиси Тимоти Смарт ҳам ҳолатга ўз муносабатини билдириб, журналист билан содир бўлган воқеани қоралади.
“Ўзбекистон Конституциясида журналист ҳуқуқларини чеклаш ва цензурага йўл қўйиб бўлмаслиги аниқ кўрсатиб қўйилган. Президент Мирзиёевнинг баёнотлари ҳам ОАВ эркинлигига содиқликни кўрсатади. Аммо бу каби ҳолатлар асл вазият тескари эканлигини яққол кўрсатиб турибди”, – дейди Тимоти Смарт.
Маълумот учун, Ибрат Сафо жорий йилнинг 28 февраль куни Чилонзор тумани ИИБга чақирилган. Маълум бўлишича, бунга унинг шу йилнинг 1 февралидаги ижтимоий тармоқда ёзилган пости асосий сабаб бўлган. Журналист Ўзбекистон ҳақида “негатив” фикрлар қолдиргани учун Жасур исмли шахс “Президент администрацияси қошидаги Оммавий ахборот воситаларини мониторинг қилувчи марказ” томонидан топшириқ олганини телефон орқали маълум қилган.
Шундан сўнг, у Ибрат Сафога “Ўзбекистон ҳукуматини обрўсизлантириш” деган қонун бор эканлигини эслатиб қўйган, журналистни эса “патриот” “ватанпарвар” бўлишга чақирган.
Эслатиб ўтамиз, Тимоти Смарт 2023 йилдан буён Буюк Британиянинг Ўзбекистондаги элчиси лавозимида ишлаб келмоқда.