2023 йил якунларига кўра Ўзбекистонда аҳоли жон бошига ҳисобланган ялпи ички маҳсулот ҳажми 29,2 млн сўмни (2 496 АҚШ доллар) ташкил қилган. Бу ҳақда Статистика агентлиги Матбуот хизмати хабар бермоқда.
Бу кўрсаткич 2022 йил билан солиштирилганда 3,8% га ўсишни кўрсатмоқда. 2022 йилда ЯИМ Аҳоли жон бошига 24,91 млн сўмни (2254,9 доллар) ташкил қилган.
Қиёслаш учун, 2023 йилда Қозоғистонда ЯИМ ҳажми киши бошига 13,3 минг АҚШ долларини ташкил этган. Бу бизникидан деярли 6 баробар кўп дегани.
Марказий Осиё ва МДҲ давлатлари ўртасида энг катта ўсиш Қозоғистонда қайд этилган бўлиб, 5,1 фоизни ташкил қилган.
Халқаро валюта жамғармасининг 2023 йилги прогнозларига кўра, аҳоли жон бошига Ялпи ички маҳсулот ҳажми бўйича Ўзбекистон, Қирғизистон ва Тожикистондан олдин ва қолган МДҲ давлатларидан кейинги ўринларда қайд этилган.
Жаҳон рейтингида киши бошига тўғри келадиган ЯИМ ҳажми бўйича энг юқори ўриндаги давлатлар қаторидан Люксембург 132 370$, Ирландия 114 580$, Норвегия 101 100$, Швецария 98 770$, Сингапур 91 100$ кабилар ўрин олган.
Маълумот учун, Статистика агентлигига кўра, 2023 йил якунига кўра Ўзбекистонда ялпи ички маҳсулот ҳажми жорий нархларда 1,07 квадриллион сўмни ташкил қилган.
Эслатиб ўтамиз, «Ўзбекистон – 2030» стратегиясида иқтисодиёт ҳажмини 2 баробар ошириш ва «даромади ўртачадан юқори бўлган давлатлар» қаторига кириш мақсад қилинган бўлиб, унга кўра, 2030 йилга қадар ялпи ички маҳсулот ҳажмини 160 миллиард долларга ва аҳоли жон бошига даромадларни 4 минг долларга етказиш кўзда тутилган эди.