Тошкентда 188-мактабда рўй берган воқеа ортидан Россия ва Ўзбекистон сиёсатчилари ўртасидаги тортишув Марказий Осиёдаги бир неча нашрларни қамраб олди. Мактабдаги воқеа ортидан Ўзбекистон ички ишларига аралашган Мария Захарованинг чиқишига биринчилардан бўлиб жавоб қилган Алишер Қодировни таҳлилчилар россиялик марҳум сиёсатчи В.Жириновскийга қиёслашмоқда.
Россия билан боғлиқ муаммолар ҳақида гап кетганда Ўзбекистон «Жириновский»си сўзга чиқади, деб ёзади Марказий Осиё бўйича сиёсий таҳлилчи Брюс Панниер. У одатда босиқ бўлган Ўзбекистон сиёсий муҳитида Қодировнинг рус шовинизмига қарши гапириши ва шовқин кўтариши юқорининг тасдиғисиз бўлмаган, дея таҳмин қилмоқда.
Владимир Жириновский Россия Федерациясининг 30 йиллик сиёсатида миллатпарастлик ва Марказий Осиё мигрантларига қарши чиқишлари билан танилган. «Миллий тикланиш» партияси раиси Алишер Қодиров россиялик сиёсатчилар томонидан Ўзбекистоннинг ҳудудий дахлсизлигига ва давлат тили сиёсатига қарши билдирилган фикрларга тезкорлик билан муносабат билдиради. Буюк Британиялик журналист Жоанна Лиллис X тармоғида Алишер Қодировни Жириновскийга қиёслаганда у Жоаннага
“Сиз мени Жириновский билан қиёслаб янглишаяпсиз. Мен шовинист эмасман. Мен тараққиётимиз миллий қадриятларимиз билан уйғунликда амалга ошиши тарафдориман”, дея жавоб қилган.
Таҳлилчи Алишер Қодировни ҳудди Жириновский каби юқори ҳокимиятга даъво қилмасдан очиқ инсайдер ролини ўйнаб келаётганини айтади.