O‘zbekistondagi “Mikrokreditbank”, “Biznesni rivojlantirish banki”, “Turonbank” larining 148 nafar boshqaruv xodimi 155 ta tadbirkorlik sub’ektida faoliyat yuritib kelayotgani aniqlandi. Bu haqida Korrupsiyaga qarshi kurashish agentligi xabar berdi.
Qayd etilishicha, “Mikrokreditbank” ATBning 94 nafar boshqaruv xodimi 96 ta tadbirkorlik sub’ektida, “Biznesni rivojlantirish banki” ATBning 41 nafar boshqaruv xodimi 46 ta tadbirkorlik sub’ektida hamda “Turonbank” ATBning 13 nafar boshqaruv xodimi 13 ta tadbirkorlik sub’ektida ta’sischi sifatida ro‘yxatdan o‘tgani ochiqlangan.
Yuqoridagi qonun buzilishi holatlari bo‘yicha agentlik mazkur banklarga taqdimnomalar kiritgan.
Banklar tadbirkorlik sub’ektlarida ta’sischilik qilayotgan xodimlariga ogohlantirish xatlari bergan.
Ma’lumot uchun, O‘zbekiston Respublikasining “Tadbirkorlik faoliyati erkinligining kafolatlari to‘g‘risida”gi, “Davlat fuqarolik xizmati to‘g‘risida”gi qonunlarida davlat fuqarolik xizmatchisi tadbirkorlik faoliyati bilan shug‘ullanishi taqiqlangan.
Eslatib o‘tamiz, avvalroq davlat xizmatchilarining 400 ga yaqini tadbirkorlik faoliyati bilan shug‘ullanganini ma’lum qilgan edik.