Чигиртка галалари Бухорога ҳам етиб келишган. Ўзбекистон бу муаммони қандай бартараф этмоқчи?
Қозоғистон ўз тарихида илк бор йирик чигиртка галалари босқинига дуч келди. Бу Ўзбекистон билан чегарадош жанубий ҳудудларида ҳам кузатилмоқда.
Туркистон вилоятида 300 минг гектардан ортиқроқда чигиртка тарқалган майдонлар аниқланган. Ҳозирда уларга қарши кураш олиб борилмоқда.
Бош вазир ўринбосари Серик Жумангарин Қозоғистон биринчи марта чигиртка тарқалишининг бундай улкан ҳудудларига дуч келганини айтган.
“Бу йилгидек чигирткалар тарқалган улкан ҳудудларни ҳеч қачон учратмаганмиз. Ва биз ҳаммамиз унинг тарқалишининг мумкин бўлган оқибатларини кам баҳолаймиз. Қишлоқ хўжалиги вазирлигининг Давлат назорат қўмитасига барча процессуал масалаларни зудлик билан якунлаб, барча зарур техникаларни зарур бўлган ҳудудларга жўнатишни топшираман. Тиғиз пайтларда ҳафтасига икки марта штаб йиғилишларини ўтказамиз»,
деди Бош вазир ўринбосари.
Туркистон вилояти ҳокимлиги маълумотларига кўра, қайта ишлаш 70 бирлик ер усти техникаси ёрдамида амалга оширилмоқда, қўшимча тўртта самолёт етиб келган. Айни пайтда барча зарур техника сабзавот ва полиз экинлари экиш атрофига жамланган. Ҳозиргача экинларга зарар етмаган.
Уч кун аввал Қишлоқ хўжалиги вазирлиги Туркистон ўлкасида чигиртка эпидемияси йўқ қилинганини маълум қилган эди. Қайд этилишича, ҳудуд тўлиқ қайта ишланган ва қишлоқ хўжалиги экинларига зарар етказилмаган.
Жорий йилда чигирткаларга қарши курашиш учун республика захирасидан 8,1 миллиард тенге ажратилди.
Ижтимоий тармоқларда Ўзбекистонда ҳам чигирткаларнинг ёпирилишига оид видеолар тарқала бошлади. Жумладан, Бухоро вилояти Ромитан туманида ҳам чигиртка галалари фаоллашгани хабар берилмоқда.
Uzdiplomat.uz мазкур ҳолатнинг келиб чиқиш сабаблари ва оқибатлари ҳақида билиш учун Қишлоқ хўжалиги вазирлиги билан боғланди.
«Бу билан вазирлик ҳузуридаги ўсимликлар ҳимояси ва карантин агентлиги шуғулланаяпти. Натижаси бўйича расмий маълумт берамиз»,
– вазирлик Матбуот котиби Дилшод Назиров.