Ўзбекистон Ташқи ишлар вазирлиги АҚШ Президенти Жо Байденнинг Ғазода ўт очишни тўхтатиш бўйича эълонини олқишлади. Бу ҳақда вазирлик ўзининг май ойи якунлари бўйича ҳисоботида сўз очган.
Маълум қилинишича, Ўзбекистон ТИВ Ғазо секторида тинч аҳоли, айниқса аёллар ва болалар қурбонлари бўлган тўқнашувларни диққат билан кузатмоқда.
“Бу ҳолат бизни чуқур хавотирга солмоқда. Ўзбекистон можароларни фақат тинч йўл ва барча мавжуд дипломатик воситалар ёрдамида ҳал қилиш тарафдори.
Шу муносабат билан инқирозни тинч йўл билан ҳал қилиш бўйича халқаро саъй-ҳаракатлар муҳим аҳамият касб этади. Биз барча мамлакатларнинг ҳаракатларини, жумладан, АҚШнинг ўт очишни тўхтатиш, гаровга олинганларни озод қилиш ва тинч ҳаётни тиклаш бўйича ташаббусини олқишлаймиз”, – дейилган ТИВ хабарида.
Шунингдек, Ўзбекистон барча томонларни вазминликка, халқаро ҳуқуқни ҳурмат қилишга, зўравонликни олдини олишга ва тинч аҳоли орасида қурбонлар сонининг янада кўпайишига йўл қўймасликка чақирган.
Маълумот учун, яқинда АҚШ президенти Жо Байден Исроилнинг Ғазодаги урушни тўхтатиш бўйича уч босқичли таклифини эълон қилган эди. Мазкур таклиф ҳудудда ўт очишни тўхтатиш ва Фаластиннинг қаршилик ҳаракати Ҳамас томонидан ушлаб турилган маҳбусларни озод қилишни ўз ичига олади.
Биринчи олти ҳафталик даврда Исроил ва ХАМАС иккинчи босқичга – ҳарбий ҳаракатларни бутунлай тўхтатишга ўтиш учун зарур бўлган музокараларни олиб боради.
Байденнинг сўзларига кўра, музокаралар давом этса ва бу борада АҚШ, Миср ва Қатар вакили бўлган воситачилар ишласа, ўт очишни тўхтатиш ҳам узайтирилади.
Аммо Байденнинг 31 майдаги баёнотидан кўп ўтмай, Исроил Бош вазири Бенямин Нетаняху унинг мамлакати барча мақсадларига эришмагунча урушни давом эттиришини айтган.