Украинада тиббиёт соҳасида таҳсил олувчи ҳиндистонлик талабаларнинг Ўзбекистонга ўқишини кўчириш истаги ортмоқда. Бу ҳақда йигирма йил давомида ҳиндистонлик талабаларга чет элда (асосан тиббиёт учун) ўқишга ёрдам бериб келаётган доктор Алах Шаран Сингх маълум қилган.
Унинг айтишича, Украина ва Россия ўртасидаги можаро 20 000 дан ортиқ ҳинд талабаларининг эвакуация қилинишига олиб келди. Уларнинг кўпчилиги ўз ўқишларини кўчириш учун даставвал Қирғизистон ва Ўзбекистонни танлашган. Аммо Қирғизистоннинг Бишкек шаҳридаги халқаро ётоқхонага уч нафар номаълум маҳаллий фуқаро киришга уриниб, хорижлик талабаларни қўрқитганидан сўнг, ҳиндистонлик ёшлар ўқишни кўчириш ва ўқишга кириш учун энг мақбул мамлакат сифатида Ўзбекистонни кўрмоқда.
“Яқинда Бишкекдаги тўқнашув кўпроқ талабаларни олий таълим олиш учун Ўзбекистонга йўналтиради. Ўзбекистондаги турли университетларда таклиф этилаётган тиббиёт курсларида ўқиш истагида бўлган талабалардан тобора кўпроқ сўровлар оляпмиз. У ерда 12 мингдан ортиқ ҳиндистонлик талаба таҳсил олмоқда. Ўзбекистон биз учун таниш ер”,
деди Infodata Cache Private Limited директори доктор Алах Шаран Сингх.
Унинг айтишича, Марказий Осиё кўплаб ҳинд талабалари, хусусан, тиббиётда ўқишни истаганлар учун тобора кўпроқ афзал кўриладиган танловга айланиб бормоқда. Яшаш нархи Европа ва АҚШга нисбатан паст, ўқиш тўлови ҳамёнбоп ва саёҳат вақти Ҳиндистоннинг йирик шаҳарларидан бир неча соатни ташкил қилади.
“Ўзбекистон Ҳиндистон билан тўғридан-тўғри рейслар орқали боғланган ва Тошкент, Бухоро, Самарқанд ва Андижонда кўплаб университетлар мавжуд. Бундан ташқари, университетлар энг сўнгги технологиялар ва ресурслар билан яхши жиҳозланган”,
дея қўшимча қилган Сингх.
Uzdiplomat.uz Ўзбекистонда хорижлик талабаларга яратилган шароитлар, уларнинг мамлакатда турли қаршилик ва ноқулайликларга учраш-учрамаслиги ҳақида билиш учун Тошкент тиббиёт академиясининг ўқув ишлари бўйича проректори Шуҳрат Бошмуродов билан боғланди.
Унинг айтишича, биргина Тошкент тиббиёт академиясининг ўзида 1,5 мингдан ошиқ ҳиндистонлик талаба таҳсил олади.
“Халқаро майдонда Ўзбекистоннинг тиббий таълим сифати ҳар доим язши баҳоланган. Айниқса, Тошкент тиббиёт академияси минг йиллик тарихга эга ва гарчи халқаро майдонда дипломларнинг тан олиниш талаблари кучайган бўлсада, Академиянинг дипломи хорижда тан олинади. Ўзбекистон улар учун арзон ва кафолатли таълим имкониятидир. Тинчлик, сифатли озиқ-овқат, яъни ижтимоий муҳит талаба учун муҳим ва бу Ўзбекистонда бор”,
деди Боймуродов.
Шунингдек, у Қирғизистонда талабалар билан сожир бўлган воқеа ҳақида гапирар экан, Ўзбекистон ҳар қайси мамлакат фуқароси учун энг тинч ва бағрикенг давлат эканини билдирди.
“Бизда ҳеч қачон бундай ҳодиса содир бўлмаган. Биз Ўзбекистонликлар бу борада анча толерантмиз, ҳамма миллатни яхши кўрамиз. Шу сабабли биргина Тиббиёт академиясининг ўзида 28 та давлатдан талабалар келиб таҳсил олади. Ҳиндистонлик талабалар Ўзбекистонлик курсдошлари билан бемалол ўқийди ва яшайди ҳам. Умуман олганда барча талабалар турар жойларининг атрофи ўралган ва у ерга бегоналар кира олмайди”,
деди у.
Проректорнинг қўшимча қилишича, шу сабабли ҳам хорижликларнинг Ўзбекистонга қизиқиши ортиб бормоқда. Улар ўзбек тилини ўрганишга киришган ва кўпчилиги аллақачон бемалол бу тилда гаплаша олади.
“Жорий йилги кириш имтиҳонлари тугагач, биз халқаро талабаларни қабул қилишни яна бошлаймиз. Улар онлайн тарзда ҳужжат топширадилар ва суҳбатдан ўтишади. Муносиб деб топилганларни эса ўқишга қабул қиламиз. Бизда ўқиш анча мураккаб, талаблар қаттиқ”,
деди Шуҳрат Боймуродов.
Маълумот учун, Марказий Осиёда 40 000 га яқин ҳиндистонлик талабалар таҳсил олади. Ўзбекистонда Ҳиндистоннинг тўртта университети – Тошкентдаги Амити университети, Андижондаги Шарда университети, Жиззах вилоятидаги Самбрам ахборот технологиялари институти ва Бухоро вилоятидаги тўртинчиси Ачаря институти фаолият юритади.