Аммо вилоят ИИБ шахсларни очиқламоқчи эмас.
Махсус хизмат ва ҳуқуқ-тартибот идоралар томонидан Самарқанд вилоятида ўтказилган рейд тадбирлари давомида, жами 47 нафар жиноий гуруҳ аъзолари қўлга олинди. Бу ҳақда вилоят ИИББ хабар берди.
Қайд этилишича, уларнинг 6 нафарига нисбатан жиноят иши қўзғатилган ва 25 нафари маъмурий тартибда қамоққа олинган.
“Самарқанд вилоятида ҳам Республикамизнинг бошқа вилоятлари сингари “Долзарб 40 кунлик” махсус профилактик тадбирлари доирасида жиноий гуруҳларга аъзо бўлган, ижтимоий муҳитга салбий таъсирини ўтказишга уринган бир неча шахслар қўлга олинмоқда”,- деб ёзилган ИИББ хабарида.
Рейд тадбирлари давомида ушбу шахслардан гиёҳвандлик ва психотроп воситалар, совуқ қуроллар (кастет, бита ва б.) просессуал тартибда расмийлаштирилиб олинган. Ҳозирда, махсус-рейд тадбирлари давом эттирилмоқда.
Аммо Самарқанд вилояти Ички ишлар бош бошқармаси хабарида қўлга олинган шахсларнинг кимлиги очиқланмаган.
Вилоят ИИББ матбуот котиби Жаҳонгир Саъдуллаев уларнинг кимлиги ҳақидаги саволимизга бу шахсга доир маълумот эканлиги сабабли очиқлай олмаслиги билан жавоб қайтарди. Uzdiplomat.uz мухбирининг “Тошкентда худди шу профилактик тадбир давомида қўлга олинганларнинг шахслари очиқланди-ку” деган гапига эса Саъдуллаев “Тошкент бу –Тошкент. Биз очиқламаймиз” дея жавоб қилди.
Эслатиб ўтамиз, аввалроқ мазкур профилактик тадбир давомида “Салимбой” тахаллуси билан танилган Салим Абдувалиев ҳибсга олинган эди.