Миллиардер Алишер Усмонов Россиядан узоқлашиш учун ҳаракат қилмоқда. Бу ҳақда Figaro нашри ёзмоқда.
Исмини очиқламаган ҳолда нашрга интервью берган Усмоновнинг ходими миллиардер Европа Иттифоқининг унга нисбатан қўйган санкцияларини адолатсиз деб ҳисоблайди. Аммо унинг айтишича, Усмоновнинг Россиядан узоқлашишига санкцияларнинг алоқаси йўқ.
“Илтимос, ҳар қандай ҳолатда ҳам Алишер Усмоновни “рус олигархи” деманг. Ўтган йилдан бери Форбес қиймати 13,5 миллиард евро бўлган металлар ва телекоммуникация магнатини ўз ватани Ўзбекистонда яшайдиган нафақахўр сифатида кўрсатди. Тасаввур қилинг, унинг бизнесдан ва Россиядан аста-секин чекинишининг санкцияларга ҳеч қандай алоқаси йўқ. Усмонов 2006 йилда нафақага чиқа бошлаган ва у 2017 йилдан бери мунтазам равишда ватанига келиб туради”,
деган Тошкентга кўрсатма олиш учун махсус келган, лекин ўз исмини айтишни истамаган вакил.
Аммо нашрнинг ёзишича, шунга қарамай Алишер Усмоновни Ўзбекистон пойтахтини танлашга ЕИ санкциялари мажбур қилган бўлиши мумкин. Чунки у ҳали ҳам Европа эътирозларини ўз ихтиёри билан тўхтата олмайди. Шу билан бирга, миллиардер ҳеч қачон Россиянинг Украинада 2022 йил февраль ойида бошланган «махсус операцияси»ни қораламаган.
“Ҳеч қачон Кремл билан алоқаси бўлмаган. Бундан ташқари, у жуда диндор ва энди ўзини фақат оиласи ва хайрия ишларига бағишлаяпти. Масалан, у хайрия ишларига тахминан 6 миллиард евродан ортиқ маблағ сарфлаган”,
деб айтган Усмоновнинг вакили.
Август ойи охирида Гамбург суди Австриянинг Куриер газетасида 70 ёшли Усмоновга нисбатан “Путиннинг севимли олигархи” иборасини ишлатишга асос йўқ, деган қарорга келиб, унинг фойдасига қарор чиқарган эди. Бу Европа Иттифоқининг 2022 йил 28 февралдаги санкцияларни оқлайдиган матнида ёзилган бўлишига қарамай Алишер Усмонов жазо чоралари юзасидан судда эътироз билдирган.
“У буни пул учун эмас, балки адолат учун қилди. Унинг фикрича, “Путиннинг севимли олигархи” деган нотўғри, ҳақоратли таъриф туфайли таъқиблар нишонига айлангани адолатсизликдир”,
дея таъкидлаган унинг ходимлари Figaro’га.
Бироқ, нашр сўнгги йигирма йил ичида “бутун Москва” Усмонов ҳақиқатан ҳам Кремл билан чамбарчас боғлиқ бизнесмен эканлиги ҳақида гапириб келаётганини эслатган.
“Усмонов сиёсатга ҳеч қачон аралашмаган оддий тадбиркор. У ҳамма нарсага ўзи эришди ва 1996 йилдан кейин (Россия олигархияси ташкил этилган пайтда) хусусийлаштиришда иштирок этишдан бош тортди. У ҳам мустақил бўлиб қолаётган “Коммерсант” газетасининг эгаси бўлди”,
дея Усмоновни оқлашда давом этган унинг вакили.
Аммо у Усмонов 2000 йилдан 2014 йилгача “Газпром Инвестмент Ҳолдинг”ни бошқарганини ва бу “Газпром” деб номланган давлат газ гигантининг шўъба корхонаси экани, шунингдек, ва Путин шахсан унинг раҳбарларини тайинлашгача бўлган барча стратегиясини бошқаришини айтмаган.
“Усмоновнинг атрофидагилар бу тадбиркорнинг муваффақиятларини унинг иқтидори билан тушунтиришни афзал кўришади. Охирги СССР даврида танқис бўлган полиетилен пакетлар ишлаб чиқаришдан тортиб, металлургияга сармоя киритишгача унинг Металлоинвест компанияси Россияда тоза технологиялардан фойдаланиш бўйича кашшоф бўлиб қолди ва кейин ўз сармояларини илғор ахборот технологиялари ва телекоммуникация соҳасига ўтказди. 2009 йилда у ҳатто Америка ижтимоий тармоқларига 200 миллион доллар сармоя киритди ва шериклари билан биргаликда тахминан 200 миллион долларни назорат қилди”,
деб ёзган Figaro.