Муҳокамага қўйилган Вазирлар Маҳкамаси қарори лойиҳасига кўра, давлат органлари фаолиятида инсон ҳуқуқ ва эркинликларини таъминланишига риоя этилаётганини рейтинг асосида баҳоловчи Инсон ҳуқуқ ва эркинликлари индекси жорий этилади.
Яъни 2025 йил 1 январдан бошлаб Давлат органлари номзодларни лавозимга тайинлаш (сайлаш), хизмат бўйича лавозимини кўтариш ёки туширишда, махсус унвонлар беришда ушбу Инсон ҳуқуқ ва эркинликлари индекси натижаларини инобатга олишни назарда тутувчи ўз ички тартибларини ишлаб чиқиб, жорий қилади.
Ҳужжатга кўра:
- — Инсон ҳуқуқлари бўйича Ўзбекистон Миллий маркази давлат органлари билан биргаликда Инсон ҳуқуқ ва эркинликлари индексида паст натижаларга эга бўлган субъектларни аниқлайди, тегишли индикаторлар бўйича кўрсаткичларни таҳлил қилади ва уларнинг сабабларини ўрганади;
- — давлат органлари аниқланган камчиликларни бартараф этиш юзасидан аниқ таклифлар ва чора-тадбирлар ишлаб чиқади ҳамда уларни амалга ошириш чораларини кўради.
- Инсон ҳуқуқлари бўйича Ўзбекистон Миллий маркази «Ижтимоий фикр» маркази ҳамда бошқа манфаатдор ташкилотлар билан биргаликда:
- — Инсон ҳуқуқ ва эркинликлари индексини аниқлаш бўйича аҳоли ва соҳа мутахассислари ўртасида тизим орқали ўтказиладиган ижтимоий сўровларни ўтказиш дастури ва баҳолаш мезонларини ҳисоблаш методологиясини тасдиқлайди;
- — Рақамли технологиялар вазирлиги билан биргаликда 2024 йил 1 июлга қадар Тизимнинг ишлаб чиқилишини ва ишга туширилишини таъминлайди;
- — Ўзбекистон президенти администрацияси ва Олий Мажлис палаталарига Инсон ҳуқуқ ва эркинликлари индексини аниқлаш жараёнидаги муаммоларни бартараф этиш бўйича таклифлар киритиб боради.