“Туркийлар – аждодларимизнинг олдига туша оладиган на бир халқ, на бир миллат бор!”
деди Ўзбекистон касаба уюшмалари Федерацияси раиси Қудратилла Рафиқов.
Бу ҳақда у бугун, 29 ноябрь куни Туркий давлатлар касаба уюшмалари Ташкилотининг биринчи съездида нутқ сўзлади.
“Биз бугун Туркий давлатлар вакиллари биргамиз. Бизни жуда катта тарих, бебаҳо умумий мерос бирлаштириб туради. Томирларимиз бир улуғ дарё – Турк дунёси ўзанларидан сув ичади.
Қалбларимиз мудом ғурурга тўладики, дунёда давлат ва империялар қуришда, илм ва тафаккур оламида Туркийлар – аждодларимизнинг олдига туша оладиган на бир халқ, на бир миллат бор! Албатта, бу бизнинг кучимиз, ақлу заковатимизни белгилайдиган тарихий фактдир”,
деган у.
Унинг қўшимча қилишича, бугун Туркий давлатлар ташкилотининг жадаллик билан ривожланиши халқларимиз ва давлатларимизнинг яқин ҳамкорлиги самарасидир.
“Туркий давлатлар ташкилотининг жадаллик билан ривожланиши халқларимиз ва давлатларимизнинг яқин ҳамкорлиги менга барчамизнинг буюк аждодимиз – қадимий турк давлати асосчиларидан бири Билга Хоқоннинг “Эй туркий элим, ўзлигингга қайт, ўзингни англа – янада юксалгайсан!” деган улуғ даъватини яна бир бор эслатмоқда”,
дея ўз нутқига якун ясаган Рафиқов.
Маълумот учун, бугун Туркиянинг Анқара шаҳрида Туркий давлатлар касаба уюшмалари Ташкилотининг биринчи съезди бўлиб ўтди. Унда жами 5 та аъзо ташкилотдан 40 нафар делегат иштирок этмоқда. Шунингдек, тадбирда Туркия жамоатчилиги вакилларидан бир қатор меҳмонлар ҳам таклиф этилган.