Тошкент шаҳар ҳокими Шавкат Умурзоқов “Оталар чойхонаси”, “Уч авлод учрашуви”, “Бувижонлар мактаби” ва бошқа шу каби учрашувларни ташкиллаштириш, шунингдек, бир пиёла чой устида суҳбатлашиш, тақдирлаш ва бошқа тадбирларни ўтказиш учун 10 миллиард сўм маблағ ажратди. Бу ҳақда ҳокимнинг кеча, 23 ноябрь куни қабул қилинган 697-14-0-Q/23 сонли қарорида сўз боради.
Унда айтилишича, “Нуроний” жамғармаси Тошкент шаҳар бўлими томонидан ҳар ойда айнан шунча маблағ “бир пиёла чой” учун ишлатиб келинган ва Тошкент шаҳар ҳокимлиги молия-иқтисодиёт ва камбағалликни қисқартириш (!) масалалари бўйича мажмуаси мазкур тадбирларни ўтказиш бўйича мурожаат қилган.
“Халқ депутатлари Тошкент шаҳар Кенгашининг “Тошкент шаҳар маҳаллий бюджетининг 2022 йилдаги қўшимча манбаларини харажатларга йўналтириш ҳақида” 2022 йил 22 апрелдаги VI-61-99-14-О-К/22-сон қарори билан “Нуроний” жамғармаси Тошкент шаҳар бўлими томонидан ҳар ойда “Оталар чойхонаси”, “Уч авлод учрашуви”, “Бувижонлар мактаби” ва бошқа шу каби учрашувларни ташкиллаштириш, шунингдек, бир пиёла чой устида суҳбатлашиш, тақдирлаш ва бошқа тадбирларни ўтказиш учун 10 000,0 млн (ўн миллиард) сўм маблағ ажратилганлиги инобатга олинсин”,
дейилган ҳоким қарорида.
Бундан ташқари, худди шундай тадбирларни ўтказиш мақсадида Тошкент шаҳар маҳаллий бюджетининг жорий йилнинг иккинчи чорак даромадлар режасини ошириб бажарилган қисми ҳисобидан яна 500,0 млн (беш юз миллион) сўм маблағ тақсимланган.
Мазкур қарор ижросини таъминлаш эса Тошкент шаҳар ҳокимининг биринчи ўринбосари Х.Шакировга юклатилиб, тақсимланган маблағнининг ижроси бўйича халқ депутатлари Тошкент шаҳар Кенгашига ҳисобот киритиши ҳамда ажратилган маблағларни ўрнатилган тартибда “Нуроний” жамғармасининг Тошкент шаҳар бўлимига ўтказиб берилишини таъминлаши керак.
Тошкент шаҳар Иқтисодиёт ва молия бош бошқармаси бошлиғи Забихулла Ғаниевга эса 2023 йил Тошкент шаҳар маҳаллий бюджетига тегишли ўзгартиришлар киритиш топширилган.
Ушбу қарор бўйича, Тошкент шаҳар Ғазначилик хизмати бошқармаси М.Зарипов ажратилган маблағларни ўрнатилган тартибда молиялаштириш чораларини кўради.
Ўзбекистон Республикаси Иқтисодиёт ва молия вазирлигининг Тошкент шаҳридаги Давлат молиявий назорати бошқармаси (Ш.Яриев) ажратилган маблағларнинг мақсадли сарфланиши устидан назорат ўрнатади. Мазкур қарорнинг ижросини назорат қилиш эса Тошкент шаҳар ҳокимининг биринчи ўринбосари Хотамбек Шакиров зиммасига юкланган.