2025 йилга қадар «Бизнесни ривожлантириш банки»даги давлат улушини хусусийлаштириш назарда тутилмаган. Бу ҳақда АОКАда ўтказилган матбуот анжуманида банк масъуллари маълум қилди.
Банкнинг Ғазначилик департаменти директори Агзам Салиховнинг таъкидлашича, “Ўзбекистон Республикаси Президентининг 2023 йил 15 ноябрдаги 366-сонли қарорига асосан, Ўзбекистон Республикаси Тикланиш ва тараққиёт жамғармасига 75 млн. АҚШ доллари эквивалентида банк акциялари жойлаштирилган. Шунингдек,
“Ўзбекистон Республикаси Президентининг 2023 йил 14 сентябрдаги 306-сонли қарорига асосан Иқтисодиёт ва молия вазирлиги томонидан 2024 йил якунига қадар яна 1 трлн. сўм миқдорида банкнинг устав капиталини оширишга маблағлар йўналтириш назарда тутилган”, – деди Салихов.
У, шунингдек, Тикланиш ва тараққиёт жамғармасига акциялар ёпиқ обуна шаклда жойлаштирилганини, банк акциялари Тошкент фонд биржаси листингига киритилганлигини ва уларни иккиламчи биржа савдолари орқали бемалол очиқ сотиб олиш мумкинлигини айтиб ўтди.
Эслатиб ўтамиз, 2023 йил 4 сентябрдаги Президент қарори билан “Қишлоқ қурилиш банк” акциядорлик тижорат банки негизида “Бизнесни ривожлантириш банки” ташкил этилганди. Банк томонидан ваколатли банклар билан биргаликда кичик бизнес лойиҳалари учун қулай шартларда 7 йилгача бўлган муддатларда имтиёзли кредитлар ажратилади.