Бугун, 16 март куни Афғонистон муваққат ҳукумати Ҳаж ва диний ишлар вазирлигининг юқори мартабали делегацияси Ўзбекистонга ташриф буюрди. Бу ҳақда Tolo News ёзмоқда.
Нашрнинг вазирлик баёнотига таяниб ёзишича, Ҳаж ва ислом ишлари бўйича вазир вазифасини бажарувчи Нур Муҳаммад Соқиб бошчилигидаги ўн кишилик делегацияни мамлакатга Ўзбекистон расмийларидан Мусулмонлар идораси раиси, муфтий Шайх Нуриддин Холиқназар расман таклиф қилган.
Маълум бўлишича, делегация ушбу мамлакатнинг дин уламолари билан учрашиб, икки томон ўртасида диний-маърифий соҳадаги ҳамкорликни ривожлантириш масалаларини муҳокама қилади.
Бундан ташқари, вакиллар Тошкент, Бухоро ва Самарқанд шаҳарларидаги диний марказларда ҳам бўлиб, Ўзбекистондаги ислом муассасалари мутасаддилари билан турли масалаларни муҳокама қилади.
Афғоншунос Суҳроб Бўронов эса жамоатчилик олдига “Толибон” билан бу соҳада яқинлашиш қанчалик тўғри, деган саволни ташлади.