Кеча вазирлик барча метан заправкалар фаолиятига қисқа муддатли чекловлар киритилаётганини маълум қилганди.
Бугун АОКАда ўтказилган брифингда қайд этилишича, 17 февраль куни Бухоро вилоятида юз берган кучли шамол туфайли 110 кВ кучланишга эга иккита электр узатиш тармоқлари аварияга учраган. Натижада «Газли» компрессор станциясидаги 8 та ҳамда «Газли» газни қайта ишлаш заводига қарашли «Учқир» компрессор станциясидаги 2 та газ ҳайдаш агрегати фавқулодда тўхтаган. Оқибатда табиий газ ҳажми меъёрий схемадагидан қисқариб, магистраль газ қувурларида босим нисбатан пасайган.
Ҳозирги вақтда аварияга учраган электр узатиш тармоқларида таъмирлаш ишлари олиб бориляпти. Газ ҳайдаш агрегатлари фаолиятини босқичма-босқич йўлга қўйиш устида ишланмоқда.
«Газ босимининг камайишини инобатга олган ҳолда, биринчи навбатда, аҳоли хонадонлари ва ижтимоий соҳа объектларини табиий газ билан таъминлаш мақсадида мамлакатимиздаги барча метан заправкалар фаолияти вақтинчалик тўхтатилди ва бу чеклов бугун ҳам давом этади«, — деди вазир матбуот котиби Ҳасан Тошхўжаев.
Маълумот ўрнида, айнан 18 февраль куни барча электр станциялар орқали жами 231,4 млн кВт·соат электр энергияси ишлаб чиқарилган. Бунинг учун иссиқлик электр станцияларида 40,3 млн кубометр табиий газ, 26,3 минг тонна кўмир ҳамда 10,7 минг тонна мазут ёқилган.
Туркманистон Республикасидан эса 21,6 млн кВт·соат электр энергияси импорт қилинган.
Республика истеъмолчиларига 225,6 млн кВт·соат электр энергияси етказиб берилган. Табиий газ истеъмоли эса 151,6 млн кубометрни ташкил қилган.