Евроиттифоқ Россияга қарши санкцияларнинг 13-пакетини эълон қилди.
Санкциялар жорий қилинган корхоналар орасида Ўзбекистонда рўйхатдан ўтган 3 та компания бор. Булар “Alfa Beta Creativ” МЧЖ, “GFK Logistics Asia” МЧЖ ва “Mvizion” МЧЖлардир.
Учала компания ҳам аввалдан шубҳа марказига тушганди. “Alfa Beta Creativ” МЧЖ ва “GFK Logistics Asia” МЧЖлар Россия ҳарбий саноатини қўллаб-қувватлашда гумонланиб, Европа Иттифоқи, АҚШ ва Япониянинг қора рўйхатига киритилган бўлса, “Mvizion” МЧЖ Буюк Британия ва АҚШ ҳукуматининг қора рўйхатидан жой олган.
Маълумот учун, “GFK Logistic Asia” – 2018 йил 28 мартда, “Alfa Beta Creative” эса 2022 йил 6 июнда рўйхатга олинган. Ҳар икки компания ҳам битта – Тошкент шаҳри, Навоий кўчаси, 16A манзилида рўйхатга олинган. Биринчисининг ягона таъсисчиси ва раҳбари – Грабилин Олег Валериевич бўлса иккинчисининг таъсисчиси худди шу GFK Logistic Asia (80 фоиз) ва Грабилин Олег Валериевичдир (20 фоиз). “Mvizion” – 2022 йил 14 июнда рўйхатга олинган. Ташкилотнинг ягона таъсисчиси ва раҳбари-Игорь Николаевич Иевлев бўлиб, ҳозирда давлат реестрида ушбу корхона тугатилаётгани қайд этилган.
Америка Қўшма Штатлари ҳам Россия билан боғлиқ навбатдаги санкциядагилар рўйхатини эълон қилди.
АҚШ Молия вазирлигининг Хорижий активларни назорат қилиш бошқармаси чекловларида ўзбекистонлик Максим Загорнов ва Polar star Logistics компаниясининг Ўзбекистондаги ваколатхонаси ҳам бор. Загорнов Россия кичик энергия ассоциацияси президенти, шунингдек, БААдаги «Деловой Россия» савдо уйини бошқаради. 1973 йил 8 июнда Тошкент шаҳрида туғилган. 2009 йилда у энергетика объектларини қуриш билан шуғулланадиган МКС компаниялар гуруҳига асос солган. Polar star Logistics Дубайда жойлашган, Тошкент ва Мумбайда ҳам офислари мавжуд. Компания товарларни етказиб беради ва логистика хизматларини кўрсатади. Polar star Logistics Tashkent 2018 йилда Давлат хизматлари марказида рўйхатдан ўтган. Жамиятнинг устав капитали 73,1 миллион сўмни ташкил этади.
Эслатиб ўтамиз, 2023 йил декабрда Европа Иттифоқи 12-санкция пакетига асли ўзбекистонлик, “Микротех” АК асосчиси ва раҳбари Андрей Хохлунни киритган. 11-санкция пакетида эса Ўзбекистон корхоналари Alfa Beta Creative ва GFK Logistic Asia киритилганди. АҚШ ҳам уларга нисбатан экспорт чекловларини жорий қилганди. АҚШ Савдо вазирлиги маълумотларига кўра, улар Россия ҳарбий ва мудофаа саноати эҳтиёжлари учун Америка товарларини сотиб олишда санкцияларни четлаб ўтишга ҳаракат қилган.