Кеча, 12 мартга ўтар кечаси Украина томонида жанг қилаётган “Россияга озодлик” легиони ва “Сибир баталёни” Россия чегарасини кесиб ўтиб, рус армияси билан тўқнашганини эълон қилди. Бу ҳақда The Moscow Times шунингдек, бир қанча Россия расмий манбаалари хабар берган.
“Россия-Украина чегарасидан хайрли тонг.
Барча ватандошларимиз сингари, легионда биз ҳам Путин диктатурасидан озод қилинган Россияни орзу қиламиз. Лекин биз шунчаки орзу қилмаймиз: биз бу орзуларни рўёбга чиқариш учун барча саъй-ҳаракатларимизни амалга оширамиз.
Режимдан еримизни сантиметр-сантиметригача қайтаришни ваъда берамиз. Энди Руслар тинч ухлайдилар, эшик қўнғироғидан қўрқмайдилар ва нима ўйлаган бўлса қўрқмасдан ўйлаганларини айтадилар. Руслар ким ёқса, шунга овоз беришади. Руслар эркин яшайдилар.
Легион келмоқда. Россия учун! Озодлик учун!”, – дея бугун пост жойлаган “Россияга озодлик” мухолифат гуруҳи ўзининг Телеграм каналида.
“Сибир баталёни” эса Россия Федерациясидаги жиноий диктатура режимини тинч йўл билан ағдариб бўлмайди, деган фикрда.
Гуруҳнинг Телеграм саҳифасида ёзилишича, бундай режимни фақат қўлда қурол билан тинчитиш мумкин.
“Бу тунда биз ваъдани бажаришга киришдик. Россия ҳудудида шиддатли жанглар кетмоқда, — дея ёзилган хабарда.
“Биз сайловга борамиз” — “Россияга озодлик” легиони раҳбари, “Сезар” лақаби билан танилган Максимилиан Андронников бир гуруҳ жангчилар қуршовида туриб баёнот берди:
“Ҳурматли ватандошлар, бир пайтлар Белгороддан дўстона Харковга ракеталар учганда, Москва хурсанд бўлди. Путин сиёсатига жавобан чегара ҳудудлари ўққа тутилганда, Москва жим қолди.
Сизни гўшт сифатида уйдан олисда фронтга олиб бориб, пахта вагонларига ортишганда, Москва хандон отиб кулди. Биз ўлдириш, вайронқ илиш, йўқ қилиш ёки жазолаш учун келганимиз йўқ. Биз сизни қашшоқлик ва қўрқувдан, ҳокимиятни тортиб олган диктатурадан халос қилиш учун келдик.
Фарзандларингизга санкцияларсиз ва репрессияларсиз нормал, маданиятли, танлови бор сайловлар бўладиган, муҳим нарсалар ҳақида гапириладиган ва энг муҳими урушсиз келажак беринг.
Путин ҳокимиятни 20 йил давомида тортиб олди ва нима бўлди? Санкциялар, иқтисодий турғунлик, 400 мингдан ортиқ рус эркакларининг ҳаёти ва соғлиғини ўлдирган қонли уруш. Россия сиёсий рақибларни ўлдирди ва жаҳон саҳнасидан бутунлай изоляция қилинди. Шунингдек, Геленджик ва Ново-Огареводаги гўзал саройлар энди вайрона.
У яна бир муддат хизмат қилишни ва ўлимигача ҳукмронлик қилишни режалаштирмоқда. Биз рухсат бермаймиз. Биз ҳам сиз каби русмиз. Биз ҳам ўз хоҳишимизни билдиришга ҳаққимиз бор ва бизнинг иродамиз қонли диктаторни Россия президенти сифатида тан олмасликдир. Унинг Новий Огаревдан Полар Вольгага ўтиши учун биз ҳамма нарсани қиламиз.
У ерда маҳаллий аҳолига қандай муносабатда бўлишини биламиз. Легион сайловга боради. Бизни кутинг”.
Кўп ўтмай Белгород ва Курск областларида отишмалар бошланди. Белгород вилоятида “Су-27” самолёти уриб туширилгани акс этган видео эълон қилинди. Маҳаллий аҳоли кучли портлаш овозини эшитган ва шундан сўнг ўрмонда йирик ёнғин бошланганинининг гувоҳи бўлишган.
Шунингдек, дронлар ҳужуми сабаб Россиянинг Орел шаҳрида нефт базасида портлаш юз берди. Санкт-Петербургдаги Южная ИEС ҳудудида кучли ёнғин содир бўлди.
Аммо Фонтанка нашрининг ёзишича, Санкт-Петербургдаги Жанубий иссиқлик электр станциясида ҳеч қандай ёнғин йўқ.
Тарқалган видеоларда эса ёнғин иссиқлик электр станциясидан темир йўл бўйлаб содир бўлган. Фавқулодда вазиятлар вазирлиги бош бошқармаси маълумотларига кўра, икки қаватли омборхона биноси ёниб кетган, холос.
Россиянинг жанубидаги шаҳар – Воронежда ҳам сиреналар овози эшитилгани, Белгород областидаги Лозовая Рудка қишлоғи муҳолифат кучлари назоратига ўтгани маълум қилинган. Курск областининг Тёткино қишлоғи учун жанглар кетаётгани ҳақида эса Курск вилояти губернатори Роман Старовоит расмий хабар эълон қилган.
“Дўстлар, бугун барчамиз учун нотинч кеча бўлди. Учувчисиз самолётларнинг оммавий ҳужуми бошланди. Бу ҳақда хабарлар бор эди. Ракета хавфи ҳалигача бартараф этилмаган. Ҳаво ҳужумидан мудофаа кучларимиз тунги вақтда ишлади. Аммо Эрталабдан Ушковский туманидаги Тёткино қишлоғи ўққа тутилмоқда.
Саботаж-разведка гуруҳи томонидан ёриб ўтишга уриниш бўлди, отишма бўлди, аммо улар муваффақиятга эришолмади. Шу боис Россия Федерацияси Мудофаа вазирлиги Федерал хавфсизлик хизматининг чегара бўлимига ҳудудларимизни ҳимоя қилгани ва тинчлигимиз учун миннатдорчилик билдираман”, – деган у.
Бу орада “Россияга озодлик” легиони чегара ҳудудидаги ҳарбий иншоотлар қаерда жойлашганини, Путиннинг ҳарбийларини кўриб турганларни, шунингдек, Россия мудофаа саноатининг махфий ҳужжатларидан хабардор бўлганлардан ёрдам сўраб чиқди. https://t.me/legionoffreedom/1117
“Бизнинг ботимизга ташриф буюринг, “Муҳим маълумотларни хабар қилиш” тугмасини босинг ва душманни топиш ва йўқ қилишимизга ёрдам беринг. Координаталар, саналар ва вақтлар, ускуналар тури, ишчи кучи миқдори, ҳужжатлар, режалар ва пароллар - буларнинг барчаси биз учун албатта энг муҳим, қимматли маълумотлардир. Қуролли қаршилик турли таркибий қисмлардан иборат бўлиб, ҳар бир киши унга қандайдир тарзда фойда келтириши мумкин. Айни пайтдаги ҳақиқий рус мухолифатини қўллаб-қувватланг”, дейилган хабарда.
Россия Федерацияси хавфсизлик хизмати ҳамда Мудофаа вазирлиги кўп ўтмай расмий муносабат берди.
Россия Федерацияси Мудофаа вазирлигининг хабар беришича, Москвада тахминан соат 3 ларда тинч аҳоли манзилларини шиддатли ўққа тутгандан сўнг Россия ҳудудига уч йўналишда – Одноробовка, Нехотеевка ва Сидорошино ҳудудларидан бостириб киришга уринган.
Мудофаа вазирлигининг таъкидлашича, Украина Қуролли Кучларининг барча ҳужумлари қайтарилган, катта йўқотишларга учраган Украина тузилмалари орқага чекинган. Чегара бузилиши ҳолатлари эса йўқ.
Россия Федерацияси хавфсизлик хизмати Россия Федерацияси ҳудудига бостириб киришга уриниши ҳақиқатга тўғри келмаслигини маълум қилинган.
“Эълон қилинган маълумотлар ҳақиқатга тўғри келмайди.
10 мартдан бери Россия Федерал хавфсизлик хизмати Россия Қуролли Кучларининг бириктирилган бўлинмалари билан биргаликда Россия Федерациясининг кўрсатилган таркибий тузилмалари доирасида давлат чегарасини бузишга бўлган бир неча уринишларни тўхтатди. Душманнинг 100 дан ортиқ ходимлари, олтита танки, ҳаракатланувчи қуроллар, 20 та зирҳли жанговар машиналар, мустаҳкам нуқта йўқ қилинди.
Украина чегара ҳудудида қуролли тузилмаларга қарши зарбалар давом этмоқда”,— дейилади хавфсизлик хизмати хабарида.
Курск вилоятидаги жанг эса Теткино қишлоғи яқинида эрталаб соат 08.00 ларда бошланган.
“Душман уч томондан чегарани бузиб ўтишга уринган. Ҳимоячиларимиз томонидан муросасиз отишма билан кутиб олинган. Бироқ, алоҳида отишмалар, ўт очиш ҳолатлари ҳозиргача давом этмоқда, — деб хабар беради WарГонзо.
Маълумотларга кўра, тўқнашувлар чоғида икки киши жароҳатланган.
Аммо Россия расмийларининг хабарларни рад этиб бориши давом этди. Масалан, Белгород вилоятида уриб туширилган “Су-27” самолёти ҳақидаги хабар ҳам кўп ўтмай рад этилди.
Аммо бошқа бир самолёт “Ил-76” Россиянинг Иваново вилоятидаги “Северный” аэродроми яқинидаги ўрмонзорга қулаб тушди. Маълумотларга кўра, унинг бортида 15 нафар одам бўлган ва уларнинг бари ўлган бўлиши мумкин.
Шунингдек, Россия ҳукумати ҳужумлар қайтарилгани, мухолифатчиларнинг ҳалок бўлаётганини эълон қилди. Аммо мухолифат гуруҳлари аксинча, Россия ичида Россия қўшинлари чекинаётганини иддао қилмоқда.
Масалан, “Россияга озодлик” легиони Курск областининг Тёткино посёлкасини тўлиқ назорат қилаётгани, россиялик ҳарбийлар ўз позисиялари ва техникаларини ташлаб қочиб кетганини маълум қилган бўлса, “Россия кўнгиллилар корпуси” ҳам ўз видеосини намойиш этиб, душман кучлари қочиб кетгани ҳақида хабар берди.
Воқеалар ривожи қандай якун топади? Бу ҳозирча номаълум. Аммо Uzdiplomat.uz’ни кузатишда давом этсангиз тез орада барчасини билиб оласиз.