АҚШ фуқаролари билан оила қурган ҳамда мамлакатда камида 10 йил яшаган ноқонуний иммигрантлар мамлакат фуқаролигини олиш учун ариза топшириши мумкин. Бу ҳақда Оқ уй маълум қилди.
Қайд этилишича, АҚШнинг амалдаги Президенти Жо Байден 18 июнь куни мамлакатда зарур ҳужжатларсиз яшовчи мигрантларга қонуний мақом бериш дастурини эълон қилган.
Ушбу янги дастур эса 500 мингдан ортиқ мигрантни қабул қилиши кутилмоқда.
АҚШ фуқаролигини олиш учун мўлжалланган мазкур дастур мамлакатда камида 10 йил яшаган ва Америка фуқаролари билан қонуний никоҳда бўлган муҳожирларга тааллуқлидир. Ушбу шартларга жавоб берадиган шахслар доимий яшаш учун ариза бериши мумкин, бунда уларнинг ихтиёрида уч йил вақт бор. Бу муддат давомида уларга оилалари билан АҚШда қолиш ва ишлашга рухсат берилади.
Оқ уйнинг ҳисоб-китобларига кўра, дастурдан фойдаланиш ҳуқуқига эга бўлганлар АҚШда ўртача ҳисобда 23 йил яшаб келаётганлардир.
«Янги жараён америкалик бўлмаган турмуш ўртоқлар ва уларнинг фарзандларига АҚШни тарк этмасдан доимий резидентлик ҳуқуқига эга бўлиш учун ариза бериш имконини тақдим этади. Бу оилаларни бирдамликда сақлашга ва иқтисодиётимизни мустаҳкамлашга кўмаклашади»,
дейилади баёнотда.
Шунингдек, Байден маъмурияти АҚШ фуқароларининг 500 мингдан ортиқ турмуш ўртоғи, шунингдек, ота-онасидан бири АҚШ фуқаросига турмушга чиққан 21 ёшгача бўлган 50 мингга яқин бола янги қоидалардан фойдалана олишини ҳам кутмоқда.
«Бу жуфтликлар оила қуради, фарзандларини черков ва мактабга юборади, солиқ тўлайди, мамлакатимиз тараққиётига ҳисса қўшади, — деди Байден дастур эълонида. — Улар шу вақтгача АҚШда қўрқув ва ноаниқлик ичида яшаб келди. Биз буни тузатишимиз мумкин».
дейилади баёнотда.
The New York Times эса янги дастур мигрантларни ҳимоя қилиш бўйича сўнгги йиллардаги энг муҳим чора-тадбирлардан бири бўлиб, ёз охиригача ишга тушиши мумкинлиги ҳақида ёзган.
Маълумот учун, 2023 йилнинг октабридан 2024 йилнинг майигача бўлган вақт оралиғида 2900 нафарга яқин Ўзбекистон фуқароси Сан-Диего ҳудудида АҚШ-Мексика чегарасини ноқонуний кесиб ўтган.