Жорий 2024 йилда энг кўп матбуот анжуманини Озодбек Назарбеков ўтказди.
Жуда кўпчилик вазирлар эса матбуот анжумани ўтказа олмади.
Белгиланган қоидаларга кўра, ҳар битта давлат амалдори омма олдида ҳисобот беришга мажбур. Бу унинг асосий вазифаларидан бири ҳисобланади. Жамоатчиликка ҳисобот бериш бу – матбуот анжумани уюштириш, журналистларнинг танқидий саволларига жавоб бериш ҳамдир.
Uzdiplomat.uz ҳокимлик ва вазирлик мутасаддиларининг бу борадаги фаолияти юзасидан мониторинг ўтказмоқда. Ҳар бир вазирлик ва ташкилотларнинг жорий йилдаги бу борадаги фаолияти мониторинг қилинади.
Маданият вазирлиги жорий йил умумий ҳисобда 8 та брифинг ва 10 та матбуот анжуманини ташкиллаштирган. Айтиш ўринлики, бошқа вазирликлар билан таққослаганда Маданият вазирлиги нисбатан очиқроқ экани аён бўлди. Масалан, шу йили ўтказилган барча матбуот анжуманларида вазир Озодбек Назарбековнинг ўзи иштирок этган.
Вазир бошқа тадбирларда ҳам журналистлар микрофонидан қўрқмайдиганлардан. Унинг журналистларга берган бир интервьюсида: “уйимни сотиб бўлса ҳам тўлайман”, деган гапи жамоатчилик орасида кенг муҳокамаларга сабаб бўлган эди.
Бироқ Озодбек Назарбековдан фарқли ўлароқ Ўзбекистон ҳукуматидаги аксарият вазирлар йиллар давомида матбуот анжумани ўтказа олмаган. Бу журъатсизликми, савиями ёки қўрқув? Мазкур саволларни ҳозирча очиқ қолдирамиз.
Uzdiplomat мавжуд вазирликларнинг ўтказган матбуот анжуманлари ва вазирлар интервьюсини мониторинг қилишда давом этади.
Айни пайтда ОАВга, жамоатчиликка чўчимасдан ўз фикрини айта оладиган, медиага очиқ бўлган Маданият вазири О.Назарбеков парламент депутатлигига ўз номзодини илгари сурган. Катта эҳтимол билан бу вазир депутат бўлиб сайланса, ОАВга очиқ интервью берадиган саноқли вазирлардан бири мансабини тарк этади.