Осиё инфратузилма инвестициялари банки Асакабанк билан муҳим кредит келишувини имзолаган. Бу ОИИБнинг Асакабанк билан биринчи ҳамкорлиги бўлиб, кредит Хитой юанида тақдим этилиши кутилмоқда. Қайд этилишича, бу маблағ Асакабанкнинг қайта тикланувчи энергия ва энергия самарадорлиги йўналишидаги портфелини кенгайтиради ҳамда яшил инвестициялар учун зарур молиявий ёрдамни тақдим этади.
Шунингдек, ОИИБ собиқ Саноат қурилиш банки билан барқарор энергия лойиҳаларини тарғиб қилиш учун мандат хатини имзолаган. Бу ҳамкорлик одатда бозорда мавжуд бўлганидан узоқроқ муддатли молиялаштиришни тақдим этади ва СҚБни қайта тикланувчи энергия лойиҳаларини молиялаштиришга йўналтиради, шунингдек, АИИБнинг Ўзбекистоннинг тоза энергия мақсадларига қўшаётган ҳиссасини кенгайтиради. Бу келишув 2024 йил январ ойида ният хати имзоланиши билан бошланган муносабатларни янада мустаҳкамлайди. АИИБ Ўзбекистоннинг умумий таълим инфратузилмасини кенгайтириш ва модернизация қилиш бўйича грант келишувини имзолаган. Бу лойиҳа АИИБнинг Ўзбекистон таълим соҳасидаги биринчи лойиҳаси ҳисобланади.
“Осиё инфратузилма инвестициялари банки Ўзбекистоннинг барқарор инфратузилма ва инвестиция ривожланишини қўллаб-қувватлаш, халқ фаровонлигини ошириш ва 2030 йил Стратегияси мақсадларига эришиш йўлида узоқ йиллик ҳамкоримиздир”, деди Лазиз Қудратов, Ўзбекистон инвестициялар, саноат ва савдо вазири.
Маълумот учун, ОИИБ – «Эртанги кун учун инфратузилма»ни молиялаштиришга ихтисослашган кўп томонлама ривожланиш банки ҳисобланади. 2016 йилда Пекинда иш бошлаган ОИИБ бугунги кунда бутун дунё бўйлаб 110 та тасдиқланган аъзога эга. Банкнинг капитали 100 миллиард АҚШ долларини ташкил этади.