Судья Худойқулов суд жараёнида ўзидан аввалги ишни кўрган судьяни «ёш бола», Савдо саноат палатасини «тўпой» деб атаган. Бу ҳақда «Эзгулик» жамияти раиси Абдураҳмон Ташанов ўзининг Facebook саҳифасида хабар қилди.
Судда бевосита қатнашган тадбиркор Сарвиноз Аҳмедова ҳам Худойқулов Зокир Нормуродович Тошкент шаҳар Тошкент туманлараро иқтисодий судининг раисининг ушбу сўзларни айтганини тасдиқлайди.
Маълум бўлишича, у эски бинони аукционда ютиб олиб, таъмирлаган. Ижара маркази ва балансда сақловчи Иргашев номли 4-сон клиник шифохонаси билан уч томонлама шартнома қилган. Унда агар ижарага олувчи иншоотни таъмирласа, харажатлар ижара пулидан чегириб ташланиши айтилади.
Шартнома талабига кўра, Ўзбекистон Республикаси Савдо саноат палатаси судга тадбиркор номидан таъмирга сарфланган 72 миллион сўмни чегириб ташлашни сўраб, судга мурожаат қилган. Августда бўлган судда тадбиркор қўллаб қувватланган. Тошкент ижара марказига 10 кун ичида янги шартнома тузиш ва 72 млн сўмни чегириб ташлашга рухсат берган.
Суд бўлган ва суд Маҳкамасига судья Тўлқинов сардор Ниғматуллаевич (мамлакат Бош прокурори Ниғматулла Йўлдошевнинг ўғли ) раислик қилган. Аммо суднинг охирги мажлисида Худойқулов ўзини суд раиси деб танитиб, судьялик чакмонини кийган. Шунингдек, “судья Тўлқинов ҳали ёш бола-ку, ССПдагилар тўпой бўлса, тадбиркорга ҳеч қандай имтиёз йўқ” – деб эътироз қилган.
Маълумот учун, Худойқулов Зокир Нормуродович Тошкент шаҳар Тошкент туманлараро иқтисодий судининг раиси сифатида фаолият кўрсатади.
Худойқуловнинг ССП ҳақида билдирган қўпол фикрларига Ўзбекистон Республикаси Судьялар Олий кенгашидан Uzdiplomat.uz муносабат сўради.
«Қонунга кўра, илк бор судьялик лавозимига тайинланадиган шахслар суд-ҳуқуқ тизимида камида етти йиллик тажрибага эга, 35 ёшга тўлган ва Судьялар олий Кенгаши ҳузуридаги Судьялар олий мактабининг судьялик лавозимларига номзодларни тайёрлаш курсида таҳсил олиши шарт. С. Тўлқинов ушбу талабларга жавоб бергани ва тегишли босқичлардан муваффақиятли ўтгани учун у 2021 йилнинг ноябрида Тошкент туманлараро иқтисодий суди судьяси лавозимига тайинлаган. Унга нисбатан «ёш бола» нисбати берилигани замирида судья сифатида нисбатан тажрибаси камлиги назарда тутилаётгани кўриниб турибди»-дейди Судьялар Олий кенгаши муносабатида.