Бугунги кунда одамлар орасида банкда ишлаб фаолият юритиш “Ислом динига тўғри келмайди”, “бу рибо”, деган мазмундаги қарашлар шаклланмоқда.
Uzdiplomat мухбири мазкур масалага ойдинлик киритиш мақсадида Тошкентдаги “Ҳасанбой” жоме масжидининг имоми Ҳасанхон Яҳё Абдулмажидга юзланди.
Унинг айтишича, банкларда фақатгина кредитлардан иборат муомалалар эмас, бошқа хизматлар ҳам бор.
“Биз банк тизимини ҳамма муомаласини мумкинмас деган қарашда эмасмиз. Лекин у ўз йўлига, банк тизими ўзига хос тизим, йўналиш. Унга ўзини хоҳловчи иштирокчилари бор, қизиқувчилари, харидорлари бор. Танлов ҳамманинг ўз қўлида”, – деди у.
Ҳасанхон Яҳё Абдулмажидга кўра, Ислом молияси бу ҳам бир тизим унинг қонун-қоидаси ҳар кимнинг виждони, эътиқоди, қарашлари, билимидан келиб чиқиб бу тизимда ишлаши мумкин.
“Ҳар битта тизимда ишни ҳалол пок бўлиши эътиборли. Масалан, сиз ҳалол касб қилишингиз мумкин, лекин унда сиз нотўғри ишлаб пул топсангиз, демак шубҳали бўлиши мумкин. Ана шу эътибордан бу саволингизга умумий жавоб бериш нотўғри деб ўйлайман”, – деди имом.
Ҳасанхон Яҳё Абдулмажидга бу вазиятга ҳолатдан келиб чиқиб, ҳар битта одамнинг ўзига алоҳида жавоб бериш мақсадга мувофиқ эканлигини айтди.
Эслатиб ўтамиз, 7 сентябрь куни ўтган “Ватандош” интеллектуал клубининг навбатдаги йиғилиши “Ўзбекистонда Ислом молияси” ҳақида бўлиб ўтган эди.
Унда Нодавлат таълим муассасалари ассоциацияси раиси, исломшунос олим Нуриймон Абулҳасан бугунги кунда ижтимоий тармоқларда домлаларимизга кредитлар бўйича кўплаб саволлар берилаётганини айтган эди.